Nan dat ki te 9 oktòb 2024 la, yo te lage frè Arsen Avanesov ki te nan yon prizon nan peyi Larisi. Okòmansman nan dat ki te 29 jiyè 2021 an, yo te kondane l pou l pase sizan edmi nan prizon. Men, li te fè apèl. Pandan apèl la, jij la te ogmante santans lan pou l ba li setan prizon. Kòm li te deja pase plis pase dezan nan prizon anvan yo jije l, kounye a li fin pase kantite tan li te dwe pase nan prizon an.

Yo te kondane frè Vilen Avanesov, papa Arsen, nan menm tribinal sa a tou e li te pase sizan nan prizon. Yo te lage l nan dat ki te 9 fevriye 2024.

Sa k te ede Arsen kenbe fèm pandan li te nan prizon an se paske li te detèmine pou l rete fidèl. Men sa l te di nan dènye pawòl li te di nan tribinal la anvan yo mete l nan prizon: “Mwen te pwomèt Jewova m ap toujou rete fidèl ak li. Mwen te vwe l lavi m, e mwen te fè sa ak tout kè m. Mwen pa vle, e mwen pa kapab, pa respekte pwomès mwen te fè l la.” Arsen te fè konnen tou lafwa solid li gen nan Bondye pa ka brannen. Li te di: “Lafwa m pa vin fennen, men li vin pi djanm toujou.”

Nou kontan paske Arsen ansanm ak fanmi l ankò, e n ap kontinye priye ak tout kè nou pou frè ak sè nou yo ki toujou nan prizon. Li rekonfòtan pou nou konnen se vre nou nan ‘lapenn akoz divès eprèv’, men lafwa nou ak andirans nou fè nou gen anpil kè kontan e sa pote anpil benediksyon. — 1 Pyè 1:6, 7.