Nan dat 14 jen 2024 la, yo lage frè Denis Antonov ak frè Aleksandr Korolev ki te nan yon prizon nan bouk ki rele Molochnitsa, nan Larisi. Yo te kondane toude frè yo nan dat 25 out 2022 pou dezan prizon. Lè yo konsidere tan yo chak la te pase nan prizon anvan yo te jije yo, sa vin fè santans yo fini kounye a.

Men sa Olga, madanm Denis fè konnen ki te ede yo pandan mari l te nan prizon an: “Nou te konn ankouraje youn lòt nan lèt nou te konn ekri e nou te konn mete vèsè biblik nan lèt yo. Gen yon vèsè sitou ki te ede nou, se Eklezyas 8:12, kote Salomon di: ‘Mwen konnen sa ap mache byen pou moun ki gen lakrentif pou vrè Dye a.’ Vèsè sa a te fè n gen konfyans si nou kontinye sèvi Jewova e nou pa bay vag, l ap ban nou fòs pou n andire.”

Nan dènye pawòl frè Aleksandr te di nan tribinal la anvan yo ba l santans li, li te konpare eksperyans li fè a ak eksperyans pwofèt Dànyèl te fè. Frè Aleksandr te di: “Malgre yo te menase touye Dànyèl, lafwa li te genyen te pouse l kontinye priye Jewova. M ap kontinye mande Bondye menm kalite lafwa sa a, yon lafwa okenn pèsekisyon pa ka kraze.”

Nou kontan pou frè Denis ak frè Aleksandr ki retounen jwenn fanmi yo. Eksperyans yo a ban nou plis asirans nan pwomès nou jwenn nan Sòm 4:3: “Se pou nou konnen Jewova ap trete moun ki fidèl avè l la yon fason espesyal. Jewova ap tande [nou] lè [n] rele l.”