Nan dat ki te 22 fevriye 2022 a, Tribinal ewopeyen dwa moun (ECHR) te pran de desizyon an favè 15 Temwen Jewova. Ka yo gen rapò ak jan lapolis te maltrete frè ak sè nou yo pandan yo te rantre lakay yo ak fòs, ant ane 2010 ak ane 2012. Tribinal la te wè Larisi te vyole dwa fondamantal frè ak sè nou yo genyen pou yo adore jan yo vle. Tribinal la te bay Larisi lòd pou l peye 99 000 ewo (112 323 dola ameriken) antou kòm dedomajman. Larisi pa ka fè apèl desizyon sa a.

De jijman tribinal la fè yo gen rapò ak sis ka ki kont Larisi a. Moun k ap defann ka sa yo fè konnen otorite Larisi yo sèvi ak manda ki pa respekte sa lalwa di pou yo ka fouye anpil kay ak Sal Wayòm, e pou yo te fouye kay de nan sè nou yo yo te arete paske y ap preche, epi sezi zafè pèsonèl yo. Nan kèk ka, se ajan FSB ki gen kagoul ak gwo zam ki rantre ak fòs nan kay frè ak sè yo, e yo aji yon fason brital avèk yo.

Ekip legal Temwen Jewova yo te pale ak André Carbonneau, ki se avoka entènasyonal dwa moun, e li te esplike yo jijman sa yo “poze yon bon baz ki montre Larisi aji yon fason ki enjis e ki vyole lalwa lè yo rantre ak fòs nan kay Temwen Jewova yo, sa gen ladan l 1 700 kay yo rantre depi lè yo entèdi Temwen Jewova yo an 2017. Kounye a, si yo ta rantre ak fòs nan yon kay jis paske moun nan se Temwen Jewova, y ap konsidere aksyon sa a kòm yon aksyon ki ilegal e ki vyole Konvansyon ewopeyen an”. Men sa li ajoute: “Li enpòtan pou n note Tribinal la kondane otorite Larisi yo paske yo anpeche Temwen Jewova yo preche kay an kay. Sa montre ECHR wè aktivite preche a kòm yon aktivite relijye otorite yo pa gendwa bloke.”

Se vre de jijman sa yo pa pale konsènan pèsekisyon Temwen Jewova yo ap jwenn nan Larisi, men yo poze baz pou Tribinal la pran desizyon alavni anrapò ak entèdiksyon yo mete sou òganizasyon nou an. Gen plis pase 60 lòt ka ki konsène Temwen Jewova yo nan Larisi ki ann atant nan ECHR. Nou swete de bon desizyon sa yo se yon apèsi sou fason Tribinal la pral jije lòt ka yo.

Nou tout kontan wè otorite nan dwa moun yo rekonèt jan frè ak sè nan peyi Larisi yo rete fèm. Desizyon sa yo montre aklè Jewova beni efò k ap fèt pou defann non l ak souvrènte l avèk fidelite. — Sòm 26:11.