17 OUT 2022
LARISI

Yo ankouraje moun nan fanmi yo malgre yo nan prizon

FÈ L JWE

Nan dat ki te 8 out 2022 a, tribinal distri Golovinski, nan Moskou, te kondane frè Aleksandr Serebryakov ak frè Yuriy Temirbulatov. Yo te kondane yo chak pou yo pase sizan nan prizon si yo arete yo pou menm bagay yo ankò. Yo pa mande yo al nan prizon pou kounye a. Yo te lage toule de frè yo menm kote a.

Dat ak evènman ki te pase

10 fevriye 2021

Otorite nan Ministè enteryè, FSB ak Gad nasyonal la te rantre ak fòs nan 16 kay Temwen Jewova. Selon sa frè yo fè konnen, yo te bat 2 ladan yo e yo t al ak 18 ladan yo pou poze yo kesyon. Yo te kenbe Aleksandr ak Yuriy.
12 fevriye 2021

Otorite yo te mete toule de frè yo nan prizon annatandan yo jije yo.
28 oktòb 2021

Yo te kouri ak Yuriy lopital kote yo te opere l ann ijans pou yo retire yon timè.
4 novanm 2021

Yuriy soti lopital, e yo fè l tounen nan prizon annatandan yo jije l.
7 fevriye 2022

Pwosè a kòmanse.

Enfòmasyon pèsonèl

Aleksandr Serebryakov

Dat ak kote li fèt: 1977 (Tchekòv, rejyon Moskou)

Byografi: Paran l yo te nan lame. Li te viv ann Ikrèn ak Kazakstan. Li te travay nan konstriksyon.

Lè li te wè lanmou ki gen nan mitan Temwen Jewova yo, sa te pouse l etidye Labib. Li te batize an 1996. Li te marye avèk Irina an 2006.

Kòmantè Irina, madanm Aleksandr, fè a

Ki jan Aleksandr ede w rete pwòch ak Jewova menm lè li nan prizon?

Aleksandr te voye lèt pou mwen ki te gen yon seri panse espirityèl ankourajan. Epitou, nou youn te ekri lòt pou pataje trezò nou jwenn nan lekti Labib pou semèn nan. Pawòl rekonfòtan ki soti nan Bib la li pataje avèk mwen fè m gen konviksyon n ap rive andire jiska lafen, e n ap rete fidèl.

Ki sa k ede w andire?

Sòm 116:1, 2 di: “Mwen renmen Jewova paske li tande vwa m. Li tande m lè m sipliye l pou m mande l sekou. Li panche zòrèy li pou l koute m. M ap kontinye rele l toutotan m ap viv.” Mwen wè imilite Jewova gen lakay li lefètke li panche zòrèy li pou l koute mwen menm, yon moun ki enpafè. Li pa fè sa paske li santi li oblije fè sa, men paske li renmen m. Li gen kontwòl tout bagay, li konnen jan nou santi nou, sa nou ka fè ak sa nou bezwen pou nou ka rete pwòch avèk li. Sa ban m asirans Jewova toupre mari m tou e l ap pran swen l.

Yuriy Temirbulatov

Dat ak kote li fèt: 1977 (Samakan, Ouzbekistan)

Byografi: Li travay nan kesyon taks.

Yuriy te marye ak Alla an 1996. Yo te kòmanse etidye Bib la ansanm e yo te batize antanke Temwen Jewova an 1998. Yo gen twa pitit.

Kòmantè Alla, madanm Yuriy, fè b

Ki jan Yuriy te ede w rete pozitif pandan li te nan prizon an?

Nan lèt li te konn ekri m yo, li te di m jan lapriyè, esperans li genyen an, ak èd frè ak sè yo te vrèman ede l. Epitou, li te rakonte m eksperyans li te fè pandan li t ap pataje bon nouvèl la ak lòt moun. Eksperyans sa yo te ankouraje l e yo te fè kè l kontan.

Ki sa k ede w andire?

Lapriyè ak meditasyon mwen fè sou esperans nou genyen an ede m pou m pa kite dekourajman fini avèk mwen. Mwen konnen pwosè sa a gen pou l fini. Jewova ap pote laviktwa, sa k ap fè n pote laviktwa tou. Souvan, mwen tande kantik 44 la ki gen tit: “Priyè yon moun ki dekouraje.” Kantik sa a gen yon seri ekspresyon ki gen anpil fòs. Lè bagay yo difisil anpil pou mwen, mwen koute kantik la e mwen jis chante l.

Aleksandr ak Yuriy bay bèl egzanp kòm moun ki ede fanmi yo ret pwòch ak Jewova menmsi yo pa menm kote avèk yo. Nou swete pou Jewova kontinye rekonpanse yo menm ak moun nan fanmi yo paske yo andire avèk fidelite. — 1 Timote 5:8.

a b Pandan nou t ap prepare atik sa a, frè Serebryakov ak frè Temirbulatov te nan prizon annatandan yo jije yo. Li pa t posib pou nou te jwenn kòmantè nan men yo.

Lòt sijè ki enteresan

NOUVÈL

Yo nan prizon pou lafwa yo — Larisi

Gen Temwen Jewova nan peyi Larisi yo mete nan prizon pou lafwa yo. Aprann nan istwa yo, e w ap ka enprime yon lis ki gen Temwen nan peyi Larisi ki nan prizon.

NOUVÈL