Nan dat 7 oktòb 2020 an, tribinal distri Mayski (repiblik Kabadino-Balkari) deklare frè Yuriy Zalipayev pa koupab e yo retire tout akizasyon ki te sou do l yo. Komisè gouvènman an gen dis jou pou l fè apèl desizyon sa a.

Komisè gouvènman an te fè konnen frè Zalipayev t ap ankouraje lòt moun fè vyolans. Men, gen plis pase 30 moun ki te temwaye pou fè konnen frè Zalipayev te sèlman konn ankouraje moun li Labib e l te toujou janti ak tout moun.

Desizyon sa a tribinal la pran an baze tou sou dènye deklarasyon yon gwoup nan Nasyonzini k ap travay kont arestasyon ilegal fè ki konfime Temwen Jewova yo pa vyolan e yo pa ankouraje vyolans sou okenn fòm.

Men sa frè Zalipayev di apre tribinal la fin pran desizyon an: “Fanmi m ak zanmim yo te prepare lespri yo pou si yo te kondane m. Grasa Jewova, mwen pa t santi m strese pandan jijman an. Mwen kontan anpil e m ap di tout moun ki te defann mwen yo mèsi anpil.”