Tribinal distri Biwobidjan, nan Rejyon otonòm juif la, pwograme pou l fè konnen desizyon li pran nan ka frè Igor Tsarev nan dat 1^ye fevriye 2021 an a. Yo ka kondane l pou katran prizon.

Igor Tsarev

• Dat ak kote li fèt: 1974 (Birakan, Rejyon otonòm juif).

• Byografi: Li gen de ti sè. Toutpandan li te lekòl, li te konn travay kòm moun k ap koupe bwa, kòm bòs chapant, e kòm elektrisyen pou l te ka soutni fanmi l. Li renmen lanati ak lapèch.

• Se pandan l te nan lame li te kòmanse ap mande tèt li ki sans lavi a. Sa te vin fè ni li menm ni papa l te kòmanse etidye Labib. Li te batize an 1997. Li te marye ak Viktoriya an 1998. Yo gen yon tipitit fi.

Otorite nan Larisi yo te ouvri yon dosye kriminèl kont frè Igor Tsarev 30 jiyè 2019. Yo akize l kòm moun k ap etidye Labib “pou l fè lòt moun konnen sa Temwen Jewova yo kwè”. Ofisye Sèvis sekirite federal yo te anrejistre kèk reyinyon Temwen yo an kachèt, e yo te prezante yo kòm prèv kont Igor. Komisè gouvènman an te mande pou jijman an fèt san piblik, sa ki yon jan dwòl. Komisè gouvènman an di si gen lòt moun la k ap tande kwayans Igor yo, yo ka vin aksepte kwayans sa yo tou. Tribinal la te apwouve demann komisè gouvènman an te fè a.

Igor di: “Nan pa twò lontan, desizyon tribinal la pral chanje anpil bagay nan lavi m. Anfèt, lavi m deja pa menm jan an ankò. Yo met entèdiksyon sou deplasman m. Nan travay mwen, mwen oblije esplike patwon m poukisa lapolis ap mennen ankèt sou mwen. Patwon m ak kòlèg travay mwen pa ka konprann rezon ki fè yo trete m fason sa a, men yo dakò se depi lontan y ap pèsekite kretyen yo.”

N ap kontinye priye pou Igor ak fanmi l. Nou konnen Jewova ap ba yo “pisans grasa lespri li”. — Efezyen 3:16.