Tribinal distri Leninski nan Rostov-on-Don pwograme pou l fè konnen desizyon li pran nan ka frè Ruslan Alyev nan dat 17 desanm 2020 * an. Komisè gouvènman an mande tribinal la pou l kondane frè Ruslan pou l pase twazan nan prizon nan yon kay ki gen polisye k ap siveye l.

Ruslan Alyev

• Dat li fèt: 1987 (Chounoya, nan tèritwa Krasnoyask).

• Byografi: Fanmi l te konn demenaje souvan. Li te viv Azèbayidjan ak Ikrèn. Li te travay nan konstriksyon e li te konn ede moun vann sa yo genyen. Li te konn aprann moun jwe gita, e li te konn anseye anglè ak chinwa. Li renmen fè espò e li konn ekri pwezi ak mizik tou. Li pale kat lang. Kristina, madanm li, pale chinwa tou.

  Li te kòmanse etidye Labib lè l te gen 13 an. Tank li t ap etidye Labib, se tank li te vin wè Bib la gen repons pou tout kesyon Ii te genyen sou lavi. Se sa k fè li te vwe Jewova lavi l e li te batize nan ane 2006.

Nan dat ki te 6 jen 2019 la, yo te ouvri yon ankèt sou frè Ruslan Alyev, sa ki te fè yo arete l nan dat 10 jen 2019 e yo te kenbe l nan prizon. Apre Ruslan ak yon lòt frè ki rele Semyon Baybak te fin pase 24 èdtan nan prizon, yo te mete yo nan yon kay ki gen polisye k ap siveye l. Okòmansman, Ruslan te gen pou l pase uit semèn nan kay sa a, men pandan nèf fwa, yo te pwolonje tan li te sipoze pase a. Se sa k fè, li te vin pase 18 mwa nan kay ki gen polisye k ap siveye l. Nan kay sa a, se sèlman ak avoka l, moun k ap mennen ankèt la, enspektè a ak madanm li li te ka pale. Li pa t gendwa sèvi ak Entènèt e li pa t gendwa voye oswa resevwa ni lèt ni mesaj tèks.

Ruslan di anvan yo te arete l, souvan, li menm ak Kristina, madanm li, te konn ap di gen yon lè y ap pèsekite yo kanmenm. Li di: “Nou te fè efò pou n toujou etidye Bib la, asiste reyinyon e priye regilyèman. Kòm nou te konn li liv Aktivite Temwen Jewova yo ak istwa lavi kèk frè ak sè, nou te byen konprann sa k ka rive lè yo pèsekite nou. Nou te remake menm nan sitiyasyon ki te pi difisil yo, yo te jwenn yon fason pou yo kenbe jwa yo e pou yo pa dekouraje.” Men sa Ruslan di ankò: “Nou te mande Jewova fòs pou nou andire kèlkeswa sa k ta rive alavni.”

Mete sou sa, kòm Ruslan te pale ak lòt moun konsènan pèsekisyon yo ka jwenn, sa te ede l anpil. Men sa l di: “Mwen te fè rechèch pou m jwenn yon seri bèl panse nan Bib la ak yon seri atik ankourajan pou ede anpil pwoklamatè nan kongregasyon an rete kalm e pou ankouraje yo. Donk, se menm vèsè ak atik mwen te chèche yo ki te konsole m lè m te bezwen sa.”

Lefètke Ruslan ak Kristina te prepare yo pou pèsekisyon, sa te ede yo. Men sa Ruslan di konsènan lè yo t ap fouye kay li a: “Mwen te santi m kalm e mwen pa t vrèman panike.” Te gen yon lè, moun ki t ap mennen ankèt la te di li vle lage akizasyon sou do Kristina tou. Men sa Ruslan di: “Kristina, madanm mwen renmen anpil la, pa t pè pou yo lage akizasyon sou do l tou. Sa te ankouraje m anpil e sa te ban m fòs.”

Kòm Ruslan nan yon kay ki gen polis k ap siveye l, bagay yo pa fasil pou li ak madanm li. Epoutan, Ruslan di: “Jewova toujou ban nou sa nou bezwen pou nou rete an vi, pou nou rete pwòch ak li e pou nou rete kalm, e se sa menm mwen te vle. Sa deja fè anpil ane depi nou aprann konte sou li e nou aprann mennen yon vi ki senp. Donk, nou pa twò enkyete nou.”

Yonfwa, pandan yo t ap koute Ruslan nan tribinal la pou yo ka pwolonje tan l ap pase nan kay ki gen polisye k ap siveye l la, yo pa t kite frè ak sè yo rantre kote yo t ap fè jijman an. Men, yo te rete deyò e yo te ba t bravo lè l t ap soti. Yo t ap di: “Ruslan, nou avè w!”

Se pa ti rekonesan nou rekonesan pou bèl egzanp frè ak sè nou yo bay nan peyi Larisi! Byenke y ap pèsekite yo san yo pa fè anyen ki mal, yo kontinye montre yo mete tout konfyans yo nan Jewova. — Sòm 118:6-9.