17 MAS 2021
LARISI
Yo ka kondane sè Tatyana Zagulina nan Biwobidjan
MIZAJOU | Tribinal la rejte apèl la
Nan dat 16 septanm 2021 an, Tribinal Rejyon otonòm Juif la, rejte apèl sè Zagulina te fè a. Santans yo te ba li a toujou valab. Li pa gen pou al nan prizon pou kounye a.
Nan dat ki te 31 mas 2021 an, Tribinal distri Biwobidjan, nan Rejyon otonòm Juif, kondane sè Tatyana Zagulina. Yo kondane l pou dezan edmi prizon k ap aplikab si yo arete l ankò pou menm bagay yo.
Enfòmasyon pèsonèl
Tatyana Zagulina
Dat ak kote li fèt: 1984 (Nan bouk Seleksyonaya, sou tèritwa Transbaykali)
Byografi: Li te etidye fason pou l desine modèl rad. Li te yon pwofesyonèl nan fè zong moun, li te koutiryè, li te sitou konn ranje rad maryaj. Li renmen jwe volebòl ak pingpong, li renmen danse ak fè triko.
Li renmen admire lanati e li kwè se kreye yo te kreye lavi. Se sa ki fè li te vin etidye Labib ak Temwen Jewova yo. Li te batize nan ane 2010. Li te marye ak Dmitriy nan ane 2012.
Sa k te pase
Nan dat ki te 17 me 2018 la, 150 polisye te fouye 22 kay Temwen Jewova. Otorite yo te rele operasyon sa a “Jou jijman”. Depi lè sa a, Biwo ankèt la te kòmanse mennen ankèt kriminèl kont 22 frè ak sè nan zòn sa a. Nan dat ki te 6 fevriye 2020 an, yo te lage akizasyon kriminèl sou sis sè, san wete Tatyana, kòmkwa y ap mennen aktivite ekstremis.
Pwosè Tatyana a te kòmanse nan dat 17 septanm 2020. Pandan l ap tann desizyon tribinal la, otorite yo fè l konnen li pa ka vwayaje kite zòn li ye a e yo pa kite l gen aksè ak kont li gen labank.
Tatyana di se lapriyè ak aktivite espirityèl li fè regilyèman yo ki fè l ka andire epi kontinye preche e defann lafwa l. Li di: “Lè [otorite yo] te vini, jan yo te frape pòt la fò a te fè m pè, men menm kote a mwen te priye. Apre sa, mwen te kòmanse santi m kalm.”
Pa egzanp, pandan otorite yo t ap fouye kay li, li te di youn ladan yo sa k ap rive la a fè lafwa l vin pi djanm. Lè otorite a te mande l poukisa, li te di li santi l ap reyalize pawòl Jezi te di nan Jan 15:20 an kote Jezi te di: “Yon esklav pa plis pase mèt li. Si yo pèsekite m, y ap pèsekite nou tou.” Men sa li te ajoute: “Youn nan otorite yo reponn li: ‘Bon, jan w ap di la a, mwen santi m tankou youn nan moun ki te touye Jezi yo.’ Lè l di sa a, nonsèlman lafwa m vin pi djanm, men tou, mwen santi lapè ak lajwa nan kè m. Mwen te ka santi Jewova la avèk mwen!” Lè pwosè a te kòmanse, tribinal la te eseye fè l pè. Men, apre li te fin mande Jewova kran, li te di: “Kounye a, m ap pale ak kouraj.”
N ap di Jewova mèsi paske li ede frè ak sè nou renmen anpil nan peyi Larisi yo e li beni yo pou ‘travay yo akonpli grasa lafwa yo, travay di yo fè avèk amou ak andirans’ yo demontre. — 1 Tesalonisyen 1:2, 3.
Lòt sijè ki enteresan
NOUVÈL
Yo nan prizon pou lafwa yo — Larisi
Gen Temwen Jewova nan peyi Larisi yo mete nan prizon pou lafwa yo. Aprann nan istwa yo, e w ap ka enprime yon lis ki gen Temwen nan peyi Larisi ki nan prizon.