Tribinal distri Metaligitcheski, nan Tchelyabensk, gen pou fè konnen desizyon li pran nan ka ki konsène sè Valentina Suvorova. a Komisè gouvènman an poko fè konnen ki santans li t ap renmen yo ba li.

Valentina Suvorova

• Dat ak kote li fèt: 1948 (Sowovskoye, nan zòn Kougan).

• Byografi: Li te pran retrèt li apre li te fin fè plis pase 30 an ap anseye nan Lekòl mizik ki Tchelyabensk lan. Li renmen fè jaden, li renmen danse ak koute mizik.

  Li te marye ak Vladimir nan ane 1973. Igor, pitit gason yo a, mouri ak kansè sa gen plizyè ane. Sa pa gen lontan depi ni manman l ni sè l la mouri.

Nan dat ki te 26 mas 2019 la, polisye ki byen ame te fouye plis pase 20 kay frè nou yo nan Tchelyabensk ak Yemanzelensk. Apre yo te fin mennen yon ankèt byen long, nan dat ki te 5 desanm 2019 la, yo te akize Valentina, ki gen 73 an kounye a, poutèt li konn li Labib e li konn pataje kwayans li ak lòt moun. Pou kounye a, yo entèdi l vwayaje. Yo akize Vladimir tou poutèt kwayans li genyen antanke kretyen.

Valentina sonje sa k te pase lè polisye yo te rantre lakay li ak zam otomatik pandan y ap dòmi. Li di: “Yo pa t kite nou fè twalèt nou, bwose cheve nou oswa met rad ki nòmal sou nou. Yo te vide tout bagay atè, e yo te kòmanse chèche tout kote, tiwa, bwat bijou, bous, pòch rad […]. Yo te gade anndan po yo, e yo te menm gade rido yo ak kabann nou.”

Akoz laj ak sante Valentina ki frajil, li te enkyete pou efè ankèt la ta ka genyen sou sante l.

Valentina esplike sa ki ede l rete fidèl se etid pèsonèl li abitye fè nan Bib la. Men sa l di: “Tèks pou jounen an, meditasyon mwen fè sou li e lefètke m aplike sa m li a ede m fè fas ak tout difikilte yo.”

Epitou, Valentina fè konnen lòt bagay ki ede l anpil pou l andire sitiyasyon ki difisil se preparasyon reyinyon yo ak asiste yo, etid pèsonèl ak adorasyon an fanmi. Li di: “Nan chak reyinyon, mwen te aprann yon nouvo bagay pou m aplike.” Li fè konnen tou lapriyè sensè li fè ba li anpil rekonfò, li di: “Mwen toujou di Bondye mèsi paske li ede m.”

Mete sou sa, Valentina kontinye ap reflechi sou pwen ki apre a, e li konn di lòt moun sa tou: “Pa gen okenn rezon pou nou pè anyen. Rete fèm, gen yon lafwa solid e sonje Matye 6:33 ak 2 Korentyen 1:3, 4.”

Li klè frè ak sè nou yo nan peyi Larisi, sa gen ladan l Valentina ak Vladimir, montre aklè pawòl ki nan Sòm 64:10 la se laverite: “Moun ki jis yo ap rejwi pou sa Jewova fè pou yo e y ap pran refij nan li. Tout moun ki dwat yo ap kontan anpil.”