Nan dat 27 janvye 2021 an a, tribinal distri Nadejdenski, nan tèritwa Primorye, pwograme pou l fè konnen desizyon l pran nan ka frè Vladimir Filippov. Yo kapab kondane l pou sizan edmi prizon.

Vladimir Filippov

• Dat li fèt: 1943 (Oktyabski, nan rejyon Novosibisk).

• Byografi: Papa Vladimir te mouri pandan Dezyèm Gè mondyal la, yon ti tan anvan Vladimir fèt. Vladimir te gradye nan Lekòl atiyri Tomsk an 1964 antanke lyetnan. Li te marye ak Lyubov an 1967. Li te pase 27 an nan lame anvan l te pran retrèt li.

  Madanm li te kòmanse etidye Labib an 1994, e li te rejwenn li nan etid la yon ti tan annapre. Yo toude te batize nan ane apre a.

Ann out 2017, otorite yo te kòmanse anrejistre konvèsasyon frè Filippov ak kèk lòt frè nan Razdolnoye ap fè. Pandan plizyè mwa, otorite yo te anrejistre moman kote Vladimir ap pale nan reyinyon yo e lè l ap pale sou Bib la ak vwazen l yo. Yo te fè anrejistreman sa yo an kachèt.

Nan dat 19 jiyè 2018 la, yon seri ofisye nan Sèvis sekrè federal la, zam alamen ak kagoul nan tèt yo, te antre lakay fanmi Filippov. Yo te bay frè Filippov, ki te gen 75 an alepòk, kout pwen nan figi l, yo te fòse l kouche atè, yo te mare men l dèyè do l epi yo fouye kay la. Yo te retounen fouye kay la de lòt fwa ankò, ann out 2019 ak janvye 2020. Se apre yo te fin fouye kay la dezyèm fwa a, yo te lage akizasyon kriminèl sou do l.

N ap priye pou Jewova kontinye bay frè ak sè nou yo fòs yo bezwen pou yo ret fidèl e pou yo kenbe jwa yo! — Ezayi 40:29, 31.