Nan dat 3 septanm 2020 an, tribinal vil Novozybkov nan rejyon Bryansk kondane frè Vladimir Khokhlov, sè Tatyana Shamsheva, sè Olga Silaeva ak frè Eduard Zhinzhikov. Yo kondane yo pou yo pase ant ennan ak ennan twa mwa nan prizon. Sepandan, kòm yo te deja pase tan sa a nan detansyon prevantif, yo lage yo.

Vladimir Khokhlov

• Dat li fèt: 1977 (Novozybkov, rejyon Bryansk)

• Byografi: Metye l se mekanisyen. Li te nan lame anvan l vin Temwen Jewova. Li renmen jwe foutbòl, li renmen li, peche pwason epi jwe gita.

• Yon zanmi te ankouraje l etidye Labib. Li te marye ak Olga an 2007. Yo gen yon pitit fi ki rele Anastasia. Yo tout ap sèvi Jewova.

Tatyana Shamsheva

• Dat li fèt: 1977 (Cherepovets, rejyon Vologda)

• Byografi: Li se yon ekonomis. Li te anseye ekonomi, dwa ak kontablite pandan anpil ane. Li te batize an 1995. Li renmen ede lòt moun jwenn konsèy saj ki gen nan Bib la.

Olga Silaeva

• Dat li fèt: 1988 (Davydovo, rejyon Moskou)

• Byografi: Se li ki pi piti nan twa pitit paran l genyen yo. Li diplome nan yon lekòl teknik kote l te aprann jeni tèmik. Li renmen koud, bwode, li renmen li e l renmen jwe volebòl. Li te vin aprann renmen Bib la grasa egzanp manman l.

Eduard Zhinzhikov

• Dat li fèt: 1971 (Novozybkov, rejyon Bryansk)

• Byografi: Li te travay kòm bòs soudi, kòm gadyen e l te nan lapolis. Li te fè pati yon gwoup mizik. An 1993, li te marye ak Tatyana ki te nan gwoup la tou. Li renmen ekri powèm epi jwe gita.

• Nan fen ane 1990 yo, li te kòmanse etidye Labib e l te jwenn repons anpil nan kesyon l te genyen yo. Repons sa yo te ede l chanje move abitid li te genyen e yo te ede l gen yon lavi fanmi ki pi agreyab. Sa te gen gwo efè sou Tatyana. E se konsa, li menm tou li te vin Temwen Jewova.

Nan dat 11 jen 2019, otorite yo te fouye 22 kay Temwen nan rejyon Bryansk nan Larisi. Yo te arete sè Tatyana Shamsheva ak sè Olga Silaeva. Yo te pase 245 jou nan detansyon prevantif. Yo te lage yo nan mwa me 2020 an e yo tounen lakay yo kote y ap tann jijman yo.

Nan dat 16 oktòb 2019, otorite yo te lage akizasyon kriminèl sou do frè Vladimir Khokhlov ak Eduard Zhinzhikov. Annapre, yo te vin mete ni dosye pa yo a ni dosye sè Shamsheva ak sè Silaeva a ansanm. Sèt jou apre, yo te mete frè yo nan detansyon prevantif e se la yo ye jis jodi a.

Yo te fè entèvyou ak sè yo nan Dènye enfòmasyon Kolèj santral la bay # 5 (2020). Sè Silaeva di uit mwa li te pase nan detansyon prevantif la ba l plis konviksyon “kèlkeswa jan sitiyasyon yo vin difiisil, Jewova ap toujou ban m ase lespri sen pou m kapab andire tout kalite pwoblèm”. Sè Shamsheva di avèk konviksyon: “Jewova toujou bò kote nou, l ap toujou soutni nou, l ap ban fòs ak èd nou bezwen.”

Nou gen konviksyon Jewova ap kontinye ede tout frè ak sè nan Larisi yo ki kapab al nan prizon oswa ki deja nan prizon pou yo andire eprèv sa a avèk kè kontan e nan lapè. — 1 Korentyen 10:13.