Nan dat 18 fevriye 2021 an, tribinal distri Biwobidjan, nan Rejyon otonòm juif la, kondane frè Konstantin Guzev pou dezan edmi prizon k ap aplikab si yo arete l ankò pou menm bagay yo. Frè Guzev pa gen pou al nan prizon pou kounye a.

Konstantin Guzev

• Dat ak kote li fèt: 1964 (Kabawòsk).

• Byografi: Papa l te vyolan e li te tafyatè. Konstantin te kòmanse ap mande tèt li ki sans lavi a. Kòm li pa t jwenn repons, li te lage kò l nan dwòg ak nan bwè tafya. Rive yon lè, li te vin kòmanse etidye Labib ak Temwen Jewova yo. Li te jwenn repons ki satisfè l. Li te fè gwo chanjman nan fason li viv. Li te batize nan ane 2000. Li te marye ak Anastasiya an 2001.

Otorite yo te fouye kay Konstantin nan mwa me 2018, pandan operasyon fouy yo te rele “Jou jijman” an. Nan operasyon sa a, 150 ofisye te fouye kay Temwen Jewova toupatou nan vil Biwobidjan. Nan dat 29 jiyè 2019, otorite yo te ouvri yon dosye kriminèl kont Konstantin. Yo te akize l kòmkwa l ap “òganize aktivite pou yon òganizasyon ekstremis”, alòske li te jis ap dirije reyinyon pou adore Bondye.

Antou, yo te ouvri 19 dosye kriminèl kont 22 Temwen Jewova nan zòn nan. Madanm Konstantin, Anastasiya, pami Temwen sa yo.

Bèl egzanp kouraj lòt frè ak sè nan peyi Larisi yo bay te fòtifye Konstantin ak Anastasiya. Men sa Konstantin di: “Mwen te wè ak de je m e m te tande ak de zòrèy mwen plizyè sè ki te di yo pap di anyen nan tribinal la. [...] Men, avèk èd Jewova ansanm ak priyè frè ak sè yo, yo te vin alèz pou yo pale e yo te defann lafwa yo.”

N ap kontinye panse ak tout frè ak sè nou yo nan peyi Larisi e n ap priye pou yo. Nou gen konfyans pa gen youn nan manèv otorite yo eseye yo k ap rive kraze fidelite yo paske Jewova avèk yo. — Ezayi 8:10.