Nan dat 12 fevriye 2021 an, tribinal distri Biwobidjan, nan Rejyon otonòm juif, fè konnen desizyon l pran nan ka sè Larisa Artamonova a. Tribinal la te ka kondane l pou jiska sizan prizon, men yo te deside kondane l pou l peye yon amann 10 000 woub (135 dola ameriken) pito.

Larisa Artamonova

• Dat li fèt: 1970 (Biwobidjan, Rejyon otonòm juif).

• Byografi: Yo te touye papa l lè l te gen twazan. Li te travay kòm chèf patisri, grafis e kòm koutiryè. Li te marye an 1990. Li gen yon pitit gason ki gen yon maladi ki ra e li menm li gen yon maladi ki atake jwenti l. Malgre pwoblèm sante l yo, li se yon moun ki aktif. Li monte bisiklèt, li monte paten awoulèt, li fè ski e l fè desen.

  Li te gen kesyon konsènan enjistis, soufrans ak bagay mal k ap fèt. Se sa k te fè l etidye Labib ak Temwen Jewova yo. Li te jwenn repons ki satisfè l nan Bib la e l te batize an 1995.

Nan dat 25 septanm 2019 la, otorite nan peyi Larisi yo te ouvè yon dosye kriminèl kont sè Larisa Artamonova. Yo te ouvè yon dosye kriminèl kont pitit gason l lan tou. Li menm ak pitit li a fè pati 22 Temwen nan Rejyon otonòm juif la yo akize kòmkwa y ap patisipe nan aktivite yon òganizasyon “ekstremis”.

Manman sè Larisa ak bòpè l sezi dèske yo te manke bay Larisa sizan prizon poutèt kwayans li nan Bondye, paske se menm santans sa a yo te bay moun ki te touye papa l la.

Yon ti tan anvan pèsekisyon an te kòmanse nan Biwobidjan, sè Larisa ak pitit gason l lan te vin pi aktif nan sèvis Jewova a. Men sa sè Larisa di: “Lè w okipe nan sèvis Jewova a e w okipe nan fè relasyon pa w avè l ak relasyon moun nan fanmi w avè l vin djanm, sa ede w pou w pa pè. [...] Satan sèvi ak moun k ap pèsekite nou yo pou l eseye fè nou kwè aktivite nou antanke kretyen ka fè nou pèdi libète nou. Jewova li menm li ban nou asirans se lè nou fè sa l mande nou fè n ap lib toutbon.”

Toule 22 frè ak sè nan Biwobidjan yo te kondane yo gen garanti Jewova kontan lè l wè fidelite yo e se sèten fidelite yo se yon repons yo bay Satan. — Pwovèb 27:11.