Nan dat 26 jen 2020, responsab nan prizon Lgov yo te mete frè Dennis Christensen nan blòk pinisyon nan prizon an (EPKT), nòmalman se prizonye k ap bay anpil pwoblèm yo konn mete nan blòk sa a. Sa yo fè a ilegal. Piske sante frè Christensen vin bese, sanble se yon kou byen monte pou yo wè si y a kraze lafwa l. Men tou, biwo komisè gouvènman an ka ap chèche lòt fo akizasyon pou yo lage sou do l parapò ak apèl yo fè pou yo pa lage l pi bonè a ankò, alòske yo te dakò ak desizyon sa a kèk jou anvan sa nan tribinal la.

Yo te kondane frè Christensen pou sizan prizon, e l deja pase plis pase mwatye tan sa a nan prizon. Depi plis pase ennan, li te vin kalifye pou yo libere l sou kondisyon oswa pou yo redui santans li an. Li te deja fè twa demann pou yo egzamine ka l la, men okenn suivi pa t fèt sou sa, se jis sou katriyèm demann nan yo te dakò pou l prezante devan jij la. Madi 23 jen 2020, tribinal distri Lgov la te dakò pou frè Christensen peye yon amann nan plas rès tan li ta dwe fè nan prizon an. Komisè gouvènman ki te la nan jijman an, M. Artem Kofanov, te menm mande pou yo redui santans lan.

Twouve, de jou apre, yon lòt komisè gouvènman, M. Aleksei Shatunov, fè konnen desizyon tribinal la te pran an ilegal, e li mande pou yo anile desizyon an. Li mande pou yo rejije ka a nan menm tribinal la men devan yon lòt jij. M. Shatunov fè demann sa a sou baz yon move rapò responsab nan prizon Lgov yo te voye sou frè Christensen, yo di li pa gen “yon bon dosye kòm moun ki travay byen e ki byen mennen lavi l nan prizon an”.

Nan dat 23 jen an, lè yo t ap jije ka frè Christensen nan, reprezantan prizon an te eseye vini ak yon seri agiman menm jan an, men jij la te twouve agiman sa yo pa t valab. Avoka ki t ap defann frè Christensen nan te montre tribinal la dokiman medikal ki pwouve frè Christensen gen pwoblèm sante, sa ki fè li pa ka fè yon seri travay fizik nan prizon an. Apre sa, pandan youn nan reprezantan prizon an t ap temwaye, li te admèt yo pa vrèman gen travay frè Christensen t ap ka fè nan prizon an parapò ak pwoblèm sante li genyen yo.

Pandan biwo komisè gouvènman an ap prepare l pou l fè apèl kont desizyon pou lage frè Christensen pi bonè a, responsab nan prizon yo gentan prepare de rapò sou frè Christensen. Premye rapò a fè konnen frè Christensen te nan salamanje prizon an nan yon move lè, e dezyèm nan fè konnen li t ap mache nan prizon an ak yon mayo sou li olye l te mete rad prizonye a. Pou rezon sa yo, responsab nan prizon yo te mete frè Christensen nan blòk pinisyon an (EPKT) pou dis jou. Selon lalwa peyi Larisi, responsab nan prizon yo ka pran yon desizyon konsa lè yon prizonye vyole règleman prizon an yon pakèt fwa e yon fason ki grav, e menm nan ka sa a, yo dwe fè prizonye a wè doktè anvan sa. Donk, piske yo pa t respekte kondisyon sa yo nan ka frè Christensen nan, pa t gen okenn baz pou yo mete l nan blòk pinisyon an (EPKT).

Nan blòk pinisyon an, frè Christensen te nan menm selil ak yon lòt prizonye, e selil la te mezire sèlman twa mèt (10 pye) longè, de mèt (7 pye) lajè. Lè pa byen sikile nan pyès la e pyès la gen mwezi, sa ki te yon gwo pwoblèm pou sante frè Christensen ki deja pa t anfòm. Kèk mwa anvan sa, li te gen pwoblèm nemoni e yo te jwenn li gen yon gwo pwoblèm nan kolòn vètebral li. Avoka frè Christensen yo fè konnen “responsab nan prizon yo konnen pwoblèm sante l yo trè byen, malgre sa yo mete l nan yon kondisyon konsa kote li t ap dòmi sou yon zo kabann byen di, sa ki te lakòz li gen anpil doulè”.

Frè Christensen fè avoka l yo konnen te gen lòt prizonye avè l nan okazyon yo di l pa t suiv règleman prizon an, alòske se li menm sèlman yo voye nan blòk pinisyon an. Avoka frè Christensen yo di: “Se sa k fè nou kwè tout bagay sa yo fè pati yon plan byen monte pou yo anpeche frè Christensen kite prizon an jan tribinal la te otorize sa.”

Byenke otorite nan peyi Larisi yo kontinye ap fè tout kalite manèv ak mannigans pou yo atake frè ak sè nou yo nan peyi Larisi, nou gen konfyans Jewova ap yon bonjan refij pou frè ak sè n yo. Ann kontinye priye Jewova pou l bay frè Christensen ak madanm li, Irina, tout sa yo bezwen pou yo rete fidèl ak li nan moman difisil sa a. — Sòm 94:13, 21, 22.