Nan dat ki te 24 avril 2022 a, frè Frank Madsen, yon manm komite Filyal peyi Malawi, te fè konnen Tradiksyon monn nouvo a — Liv ki te ekri an grèk yo parèt nan lang chiyayo sou fòma elektwonik. Gen plis pase 148 000 moun ki te gade pwogram yo te anrejistre alavans lan nan televizyon pa mwayen satelit ak lòt platfòm ankò tankou bwat JW a ak JW Stream. Tradiksyon an ap disponib alavni sou fòma enprime.

Tout Bib la te disponib nan lang chiyayo depi nan ane 2014. Men, tradiksyon yo te gen kèk bagay ki pa egzak, e yo te retire non Bondye nèt, anpalan de Jewova, malgre non sa a parèt plizyè milye fwa nan tèks orijinal la.

Se sa k fè, anpil pwoklamatè te twouve l difisil pou yo sèvi ak tradiksyon Labib sa yo lè y ap preche. Men sa youn nan tradiktè yo di: “Nou te konn pase anpil tan ap esplike rezon ki fè non Bondye pa parèt nan tradiksyon an olye nou anseye yo enpòtans non Bondye.” Pa egzanp, gen yon tradiksyon Labib nan lang chiyayo ki te tradui Matye 22:44 konsa: “Seyè a di Seyè m nan.” Men, Tradiksyon monn nouvo a tradui l yon fason ki egzak, li di: “Jewova di Seyè m nan.”

Men sa yon lòt tradiktè di lè l ap reflechi ak lòt avantaj tradiksyon ki fèk parèt la genyen: “Kòm Tradiksyon monn nouvo a – Liv ki te ekri an grèk yo nan lang chiyayo a klè e li fasil pou moun konprann, moun yo ap konprann sa yo li a tousuit e y ap anvi aplike sa yo aprann yo.”

Nou kontan tradiksyon Labib sa a disponib kounye a pou ede plizyè milyon moun ki pale lang chiyayo pou yo rive konnen non Jewova, “Sila a ki nan pi gwo pozisyon an e ki gen pouvwa sou tout tè a”, e pou yo rive pwoche bò kote l. — Sòm 83:18.