Nan dat ki te 28 fevriye 2021 an, Tradiksyon monn nouvo a — Liv ki te ekri an grèk yo parèt nan lang ndo. Sa ki vin fè Tradiksyon monn nouvo a disponib kounye a ann antye oswa an pati nan 200 lang. Mete sou sa, yon jou anvan sa, sa vle di nan dat ki te 27 fevriye a, Labib — Bon nouvèl la selon Matye te parèt nan lang chwabo.

Se nan yon pwogram ki te anrejistre alavans e yo te pase pou pwoklamatè yo frè Amaro Teixeira, ki nan komite Filyal peyi Mozanbik, te anonse toule de tradiksyon sa yo parèt sou fòma elektwonik. Mete sou sa, yo te pase pwogram nan sou yon estasyon televizyon nasyonal ak sou plizyè estasyon radyo peyi a. Labib — Bon nouvèl la selon Matye ki te parèt nan lang chwabo ap disponib tou nan yon bwochi k ap gen 64 paj pou moun ki pa gen aparèy elektwonik.

Gen anviwon 1,4 milyon moun nan pwovens Zanmbezi ki pale lang chwabo. Gen 492 pwoklamatè k ap asiste reyinyon nan kongregasyon ki nan lang chwabo.

Frè Nicholas Ahladis, ki travay ak Sèvis tradiksyon nan syèj mondyal la, di: “Se yon gwo bagay lefètke yo tradui liv Matye a nan lang chwabo. Tradiksyon ki te la anvan an pa t fasil pou moun jwenn e li te difisil pou moun konprann.”

Gen anviwon 1,1 milyon moun, sa gen ladan l 1 500 pwoklamatè, nan peyi Mozanbik ki pale lang ndo.

Pandan ekip tradiksyon nan lang ndo a t ap travay sou pwojè a, yo te fè fas ak twa gwo katastwòf natirèl. Nan ane 2019, siklòn Idai te kraze peyi Mozanbik. Ane ki vin apre a, peyi Mozanbik, menm jan ak tout monn nan, te gen pou fè fas ak efè pandemi COVID-19 la lakòz. Epi, nan kòmansman ane 2021 an, siklòn Eloise te lakòz gwo dega nan peyi a. Malgre tout pwoblèm sa yo, senk moun ki fè pati ekip tradiksyon an te fini travay la nan dezan edmi.

Men sa yon moun ki nan ekip tradiksyon ndo a di: “Lè m wè nou rive fini malgre tout pwoblèm sa yo, mwen toujou pa ka kwè sa m wè a. Pou mwen, se yon mirak. Pou jan sitiyasyon an te ye a, nou pa t ka rive fè travay la ak pwòp kapasite nou. Se Jewova ki ede nou rive la, tout glwa a se pou li.”

Frè Ahladis di: “Frè ak sè nou yo ki pale lang ndo, sa gen ladan l tradiktè yo, te fè fas ak anpil pwoblèm dènye ane sa yo, sa ki te pwolonje dat pou yo fini ak tradiksyon Labib la. Men, kounye a, tradiksyon Liv ki te ekri an grèk yo ap yon benediksyon pou frè ak sè yo, e l ap pote ankourajman ak fòs pou moun ki pale lang ndo yo.”

Frè Geoffrey Jackson, yon manm Kolèj santral la, di: “Chak fwa gen tradiksyon Labib k ap fèt, tradiktè yo fè sakrifis e yo fè fas ak pwoblèm. Difikilte ekip tradiksyon nan lang ndo a te jwenn, san wete katastwòf natirèl yo, fè li apwopriye pou tradiksyon Liv ki te ekri an grèk yo nan lang ndo se 200^yèm lang tradiksyon monn nouvo a disponib. Tradiksyon sa a ap yon gwo benediksyon pou moun nan peyi Mozanbik ki pale lang ndo.”

Nou kontan ak frè ak sè nou yo lefètke tradiksyon sa yo parèt pandan pandemi an. Li klè, pa gen anyen ki ka anpeche Jewova reyalize objektif li. — Ezayi 43:13.