Jou ki te 30 desanm 2022 a, tribinal distri Oslo a te aksepte demann frè n yo te fè pou mande gouvènman an kanpe sou desizyon l te pran pou yo pa rekonèt Temwen Jewova yo kòm yon relijyon ofisyèl ankò nan peyi Nòvèj. Li te enpòtan pou n te fè sa paske gouvènè rejyon Oslo ak Viken te anonse li deside anile anrejistreman Temwen Jewova yo kòm yon relijyon ofisyèl. Lòd sa a tribinal la bay la pèmèt nou kontinye aktivite nou antanke relijyon jiskaske yon tribinal jije ka a. Ministè fanmi ak timoun pa dakò ak desizyon sa a tribinal la pran an.

Desizyon sa a tribinal distri a pran an te byen tonbe pou frè ak sè yo, san wete plizyè moun ki te fiyanse. Nan peyi Nòvèj, gouvènman an nome yon moun kòm selebran relijye sèlman si leta rekonèt relijyon moun sa a ofisyèlman. Lè gouvènman te pran desizyon pou l pa rekonèt Temwen Jewova yo kòm yon relijyon ofisyèl ankò, sa t ap vle di frè yo te nome kòm selebran yo t ap pèdi otorizasyon sa a. Sepandan, desizon sa a tribinal distri a pran an pèmèt moun ki te fiyanse yo marye nan yon Sal Wayòm e yon selebran Temwen Jewova ka fè maryaj la.

Frè André Bjørnstad ak sè Yasmin de Andrade Montelo te pami moun ki te fiyanse desizyon sa a gen efè sou yo. Yo te mete kòmantè yo nan demann ki te depoze nan dat 28 desanm 2022 a. Frè Bjørnstad konprann gen kèk moun ki ka ap mande poukisa yo detèmine pou se yon Temwen Jewova ki selebre maryaj yo. Men sa l esplike: “Lafwa moun ak kwayans yo se bagay ki vrèman enpòtan. Lè lòt moun pa respekte lafwa yo ak kwayans yo, se kòmsi yo pèdi idantite yo.”

Anvan gouvènman an te pran desizyon pou l pa rekonèt Temwen Jewova yo kòm yon relijyon ofisyèl ankò, li te gentan refize rekonèt dwa nou te genyen pou n resevwa sibvansyon Leta te konn ban nou an depi plis pase 30 an an. Dwa sa a pèmèt plis pase 700 relijyon ki anrejistre nan peyi a jwenn sibvansyon nan men Leta. Jou ki te 21 desanm 2022 a, Temwen Jewova yo te depoze yon plent kont gouvènman peyi Nòvèj la, pou di yo pa dakò ak desizyon an.

Gouvènman peyi Nòvèj la pa dakò ak kwayans nou anrapò ak dispozisyon pou eskominye moun nan. Gouvènè a menm rive mande Temwen Jewova yo pou yo chanje dispozisyon sa a si yo vle pou leta kontinye rekonèt Temwen Jewova yo kòm yon relijyon ofisyèl. Aksyon sa yo kont Temwen yo pa chita sou opinyon okenn espè oubyen desizyon yon tribinal te pran.

Gouvènè a deklare lè yo pa rekonèt yon relijyon ofisyèlman sa pa retire anyen nan dwa moun genyen pou yo pratike relijyon yo vle. Men, nan lòt ka kote yo te refize rekonèt òganizasyon nou an antanke relijyon ofisyèlman, Tribinal ewopeyen pou dwa moun nan (ECHR) te fè konnen desizyon sa yo pa respekte dwa Temwen Jewova yo genyen pou yo adore Bondye jan yo vle. a

Men sa frè Jørgen Pedersen, yon manm Komite filyal Eskandinavi a di: “Temwen Jewova yo gen plis pase 130 an depi y ap pratike adorasyon yo a nan lapè nan peyi Nòvèj. Konstitisyon peyi Nòvèj la ak konvansyon ewopeyen pou dwa moun nan pwoteje libète ak dwa fondamantal nou yo. Si tribinal peyi Nòvèj yo pran desizyon an favè nou, sa ap yon garanti anplis pou dwa ak libète tout sitwayen nan peyi Nòvèj.”