Soti 28 fevriye pou rive 10 mas 2024, yo te fè yon ekspozisyon liv nan peyi Paragwe nan vil Asunción. Se yon ekspozisyon yo fè chak ane ki rele Libroferia Capel. Yo estime gen 10 000 moun, timoun kou granmoun, ki al nan ekspozisyon sa a chak ane. Gen plis pase 160 frè ak sè ki te travay nan stann ki te gen Bib ak yon pakèt lòt liv ki ede moun etidye Bib la, yon seri liv ki disponib sou jw.org. Yo te montre vizitè yo piblikasyon ni sou fòma enprime ni sou elektwonik nan lang gwarani, lang siy paragweyen ak espayòl.

Gen yon mesye ki te remake pankat ki di nou ofri etid biblik gratis la. L al pale ak frè yo. Frè yo esplike l jan etid la fèt, e yo montre l bwochi Ou kapab viv ak kè kontan pou toutan! an. Li feyte l epi li di: “Mwen pa t janm konnen si Bib la te reponn tout kesyon sa yo.” Li te byen kontan aprann non Bondye se Jewova. Yo te pran randevou avè l pou yo ka fè etid avè l.

Yon lòt lè, gen yon mesye ki t ap pale ak youn nan sè ki te nan stann nan. Li di li kontan wè kantite sijè nou gen sou sit nou an nan lang gwarani, gwarani (Mbyá), ak lang nivakle. Li felisite Temwen Jewova yo pou tout sa yo fè pou yo tradui liv biblik nan divès lang moun yo pale nan peyi a.

Men sa frè Daniele Sarcone, youn nan moun ki te fè pwogram pou volontè yo vin travay, di: ”Nou te byen kontan fè anpil bèl konvèsasyon ak moun ki te vle aprann plis bagay sou Labib.” Pandan ekspozisyon an, te gen pou pi piti 13 moun ki mande plis enfòmasyon sou etid biblik nou fè ak moun yo.

Sa fè nou plezi pou n aprann jan anpil moun nan peyi Paragwe kontinye ap tande Pawòl Bondye a toutpandan gen plis moun toujou ki bezwen konn laverite. — Sòm 119:160.