18 ME 2022
POLÒY
Yon vizit espesyal pou volontè ak refijye ikrényen ki nan peyi Polòy yo
Nan dat ki te dimanch 1ye me 2022 a, frè Mark Sanderson, yon manm Kolèj santral la, ansanm ak twa manm komite filyal, te kòmanse vizite frè ak sè ki te kouri kite Ikrèn pou al nan peyi Polòy yo. Pandan vizit frè Sanderson ak frè ki te akonpaye l yo t ap fè yo, yo te tande istwa refijye yo, e yo te fè yo sonje Kolèj santral la renmen yo e l ap kontinye soutni yo.
Soti agoch pou al adwat: Tomasz Wolczko ki nan komite filyal peyi Polòy, Mark Sanderson, Vesa Väänänen ki nan komite filyal peyi Polòy, ak Tommi Kauko ki nan komite filyal peyi Fenlann.
Y ap pale sou jan y ap òganize travay pote sekou a sou fwontyè a.
Pandan sis jou, frè yo te fè plis pase 2 500 kilomèt ap vwayaje pou yo te ka vizite refijye yo diferan kote yo te ye yo, sa gen ladan l kat Sal asanble ak plizyè Sal Wayòm. Epitou, yo te rankontre ak volontè ki sou fwontyè ki ant peyi Polòy ak peyi Ikrèn nan.
Gen yon frè ki moun peyi Ikrèn ki fè konnen vizit la te vrèman ankourajan pou chak moun. Se te egzakteman sa yo te bezwen. Se te tankou lapli ki tonbe sou tè sèk.
Men sa yon sè ki moun peyi Ikrèn di: “Vizit sa a se te yon bèl sipriz. Nou ka wè jan Jewova renmen nou.”
Men sa yon lòt sè ki moun peyi Ikrèn di: “Lè n te rive Polòy, nou pa t gen anyen, men grasa Jewova, kounye a nou gen tout sa nou bezwen.”
Volontè k ap travay nan yon Sal asanble nan Stęszew, nan peyi Polòy, kote yo prepare èd pou frè ak sè yo.
Frè yo te rankontre tou ak volontè k ap ede refijye yo. Pou frè Sanderson te ede yo wè santiman Kolèj santral la gen pou yo, li te site pawòl ki nan Ebre 6:10 la pou l fè yo sonje Jewova pap ‘bliye travay yo fè’. E li te di yo: “Nou pap bliye sa tou.” Volontè yo te di yo kontan paske yo kapab ede kwayan parèy yo.
Yo vizite sè ki aje ki soti Ikrèn; yo devan yon Sal Wayòm nan Radimno, nan peyi Polòy.
Frè Vesa Väänänen, yon manm komite filyal peyi Polòy, di: “Sa vrèman ranfòse lafwa nou pou n wè jan Jewova gen kontwòl sitiyasyon an. Jewova ban nou egzakteman sa nou bezwen nan bon moman pa mwayen Kolèj santral la e pa mwayen frè ak sè yo ki dispoze fè sakrifis pou yo ede lòt moun.”
Yon gwoup kondiktè ak lòt volontè ki deyò Sal asanble ki Stęszew, nan peyi Polòy.
Pandan frè ak sè nou yo ap kontinye pran swen youn lòt, kèlkeswa jan sitiyasyon an ye, yo vin gen lajwa moun jwenn lè yo bay, jan Jezi te pwomèt sa. — Travay 20:35.
