Nan kèk zòn nan Repiblik demokratik Kongo ak Repiblik Kongo, nonsèlman frè ak sè nou yo ap fè fas ak pandemi kowonaviris la k ap fè raj, men tou yo soufri akoz inondasyon ak lagè. Filyal Kongo a (Kinchasa), li menm k ap sipèvize travay predikasyon an nan toule de peyi sa yo, te fè aranjman pou pèmèt frè ak sè yo resevwa sa yo bezwen ak ankourajman ki soti nan Bib la. Filyal la òganize 57 komite sekou ki gaye sou tout tèritwa filyal la yon fason pou l kapab reponn ak bezwen frè ak sè yo. Pou kounye a, komite sekou yo deja ede plis pase 90 000 frè ak sè jwenn manje.

Nan dat 16 ak 17 avril 2020, te gen gwo lapli ki te lakoz inondasyon nan vil pwovens ki nan lès Repiblik demokratik Kongo. Sa te fè 139 pwoklamatè k ap viv nan zòn nan oblije deplase kite kay yo. Plizyè lòt frè ak sè te akeyi yo lakay yo. Komite sekou nan zòn nan ap travay pou yo jwenn kote pou frè ak sè ki kite kay yo rete swa pou yon ti tan swa nètale.

Frè ak sè yo te montre yo donan nan jan yo ede komite sekou yo. Nan yon zòn, pwoklamatè yo te rive rasanble 700 kilogram (1 543 liv) bannann, 400 kilogram (882 liv) mayi, ak 220 kilogram (485 liv) manyòk ak fèy manyòk.

Anplis de sa, 60 pwoklamatè ki nan kongregasyon ki rele Some 26 km la te akeyi 50 nan frè ak sè nou yo ki t ap kouri akoz gè ki gen nan zòn yo a. Pwoklamatè yo te pataje manje yo te genyen ak frè ak sè sa yo ki sove kite lakay yo annatandan yo resevwa manje nan men yon komite sekou.

Men ki jan yon chèf fanmi k ap viv Brazavil, kapital Repiblik Kongo, dekri eksperyans li te viv lè l te resevwa èd nan men komite a: “Vi yon moun kapab chanje nan yon batje. Mwen t ap travay e m pa t ap touche gwo bagay, madanm mwen bò kote pa l te konn jwenn kèk ti djòb. Sa te pèmèt nou jwenn mwayen pou nou viv. Lè pandemi an te kòmanse, nou pa t rantre kòb ankò. Men, malgre sitiyasyon sa a nou pa t pèdi konfyans nou te genyen nan Jewova a. Yon jou, pandan n t ap pale pou n konnen sa n pral fè lè manje yo fini, Jewova te fè yon bagay pou l ede nou.”

Sè Mbuyi Ester, yon vèv k ap viv nan vil Kinchasa, te rakonte eksperyans pa l. Men sa l di: “Mari m mouri sa gen yon mwa, e m te vrèman nan nesesite. Mwen gen twa timoun pou m bay manje e m pap travay. Fanmi an pa t ap janm kapab jwenn kantite manje sa a pou nou manje pandan tout jou sa yo. Mèsi Jewova!”

N ap priye pou Jewova kontinye pran swen frè ak sè nou yo e pou l beni travay komite sekou yo. Epitou nou pa ka tann lè tout moun pral kapab jwi moman kote tè a pral chaje ak manje. — Sòm 72:16.