Soti 10 me pou rive 26 me 2024, chanpyona entènasyonal Federasyon mondyal òki sou glas la te fèt nan Repiblik Tchèk. Te gen prèske 800 000 moun ki te asiste tounwa a ki te fèt nan Ostrava ak Prag, de vil nan peyi a. Temwen Jewova yo te mete charyo piblikasyon deyò stad kote yo t ap fè chanpyona a. Pi ba a, n ap jwenn kèk eksperyans ankourajan.

De jèn gason te pwoche bò kot yon charyo piblikasyon epi mande frè yo avèk jantiyès kiyès yo ye e ki sa y ap fè la a. Frè yo te pale mesye yo de travay Temwen Jewova yo epi yo te esplike yo ki jan nou fè etid Labib ak moun yo sou fòm konvèsasyon. Youn nan mesye yo te mande ki lè e ki kote yo fè yon etid Labib konsa. Frè yo te esplike yo ka fè etid la nan lè ak kote ki bon pou li. Li te aksepte yon etid Labib.

Yon lòt lè, te gen twa mesye ki te pale ak frè nou yo e yo te sezi aprann yo pa peye Temwen Jewova yo pou yo preche. Youn ladan yo te di: “Si yo pa peye nou, ki sa nou jwenn menm ki fè nou fè travay sa a?” Temwen yo te esplike l fason ansèyman ki nan Bib la te amelyore lavi yo e ba yo yon espwa pou demen. Gen youn ladan yo repons lan te tèlman touche l, li te di li ta renmen aprann plis epi li te mande bwochi Viv ak kè kontan pou toutan!

Gen yon lòt mesye ki t ap mache ki te pase plizyè fwa bò charyo piblikasyon yo. Rive yon lè, li te kanpe epi l di Temwen yo: “Ki diferans ki genyen ant sa nou kwè yo ak sa legliz mwen an anseye yo?” Frè yo te sèvi ak Bib la pou ba l kèk esplikasyon tou kout sou kwayans Temwen Jewova yo. Mesye a te koute avèk atansyon e li te remèsye yo pou esplikasyon klè yo te ba li. Temwen yo te montre l kèk bagay enteresan sou jw.org ak fason pou l sèvi ak sit Entènèt la pou l aprann plis bagay sou Bib la ak ansèyman ki ladan l.

Nou apresye frè ak sè nou yo nan Repiblik Tchèk paske yo chofe pou yo fè tout moun ki vle koute tande “bon nouvèl la”. — Women 10:15.