Soti 17 pou rive 26 me 2024, gen plis pase 600 frè ak sè nan Sèbi ak Montenegwo ki te patisipe nan yon kanpay predikasyon espesyal ki te fèt nan plizyè zòn ki lwen nan peyi Sèbi. Se premye fwa depi plis pase 20 an Temwen Jewova yo fè yon kanpay an pèsòn nan peyi Sèbi. Yo panse gen plis pase 1, 5 milyon moun, sa vle di prèske yon ka nan popilasyon peyi a, k ap viv nan zòn ki lwen kote frè yo pa ka ale souvan. Yon bagay estrawòdinè, sèke pandan kanpay la, nou resevwa plis pase 1800 demann etid Labib.

Nan vil Beli Potòk, apre yon dam te fin gen yon bèl konvèsasyon ak Temwen yo, li te telefone plizyè nan vwazen l yo pou l di: “Gen yon seri moun ki pral vin pale nou de Bondye ak Bib la. Byen koute yo!” Nan dènye kay nan bouk la, gen yon dam ki t ap tann yo. Li salye yo ak anpil kè kontan epi l fè yo antre. Li fè yo konnen li te asiste Memoryal lanmò Kris deja. Dam nan te byen kontan aksepte yon etid Labib.

Gen yon mesye ki rele Radomir ki t al pale ak de Temwen ki t ap preche ak yon charyo nan yon vil ki rele Smederevska Palanka. Mesye a di jan l kontan wè moun ki enterese nan Bondye vin nan vil li a. apre sa, li poze kesyon sou etid biblik gratis li te wè ki afiche sou pankat nan charyo a. Lè frè yo fin esplike Radomir ki jan nou fè konvèsasyon biblik ak moun yo, li te byen kontan aksepte yon etid.

Se pa ti benediksyon kanpay espesyal sa a te pote pou frè ak sè nou yo nan Sèbi e pou tout moun ki swaf laverite ki nan Bib la! — Jan 7:37.