Soti 15 desanm rive 31 desanm 2022, pou premye fwa, Temwen Jewova yo te patisipe nan yon evènman yo rele an fransè Foire internationale de Dakar (FIDAK), nan peyi Senegal. Dat sa a te fè FIDAK la 30 an depi l egziste. Nan evènman sa a, yo prezante bagay atizana, yo ofri diferan sèvis yon moun ka bezwen ak bagay kiltirèl. Gen plizyè santèn milye moun ki soti diferan kote ann Afrik e toupatou nan monn nan.

Frè ak sè yo te gen yon stann ki te gen enfòmasyon sou jw.org ansanm ak piblikasyon ki pale sou lavi fanmi. Pwoklamatè yo te pase videyo nan seri videyo Fè zanmi ak Jewova, Desen anime ak entèvyou kèk jèn nan seri videyo Sa lòt jèn di.

Anpil nan vizitè yo pa t konn sit Entènèt nou an e yo t al vizite l sou telefòn yo menm kote a. Anpil ladan yo te sezi wè sit jw.org la gen atik ki disponib nan plis pase 1 000 lang, sa gen ladan l lang yo pale a nan zòn nan ki se wolòf. Pwoklamatè yo te bay vizitè yo plis pase 3 000 piblikasyon.

Men sa yon vizitè te di:“Tan nou te pase nan stann nou an se te pati ki pi enpòtan nan tout vizit nou nan ekspozisyon sa a.” Gen yon lòt ki di:“Si yo t ap bay prim pou pi bon stann lan, se nou menm ki t ap genyen l!”

Men sa frè Martin Laud, ki t ap ede nan òganize stann nan, di: “Nou te kontan akeyi tout vizitè sa yo ki soti nan plizyè peyi. Anpil ladan yo te di nou mèsi ak tout kè yo pou bonjan enfòmasyon nou te ba yo sou Bib la gratis.”

Nou kontan wè rezilta pozitif sa yo nou te jwenn lefètke nou te patisipe nan evènman sa a. Se yon lòt fason pèp Jewova a kontinye pataje “sajès” ki soti nan Pawòl Bondye a ak lòt moun. — Pwovèb 3:21, 22.