Jan nou te di sa anvan, nan dat ki te 21 septanm 2021 an, yo te lage frè Rustamjon Norov anvan lè akoz yon nouvo lwa ki gen nan peyi Tajikistan yo kòmanse aplike nan kòmansman mwa septanm 2021 an. Kounye a frè Rustamjon gen 22 an. Li te pase twa mwa antou nan prizon annatandan yo jije l. Nan dat ki te 10 me 2021 an, yo te transfere l nan yon prizon nan Yavan, kote li t apral pase twazan edmi nan prizon. Pandan Rustamjon te nan prizon e pandan pwosè a, moun ki t ap gade l yo te sezi wè jan li gen bon konduit e li fidèl.

Yon lè, pandan pwosè frè Rustamjon, te gen yon kolonèl ki te pwoche kot Rustamjon pou l ba l lanmen. Kolonèl la te fè konnen jis nan ki pwen li gen gwo respè pou Rustamjon pou kouraj ak detèminasyon li genyen. Kolonèl la di: “Chak moun ki kwè nan Bondye ta dwe tankou w.” Li ajoute: “Jis imajine ane k ap vini yo lè peyi Tajikistan bay moun posiblite fè sèvis sivil! Ebyen, non w ap pami moun ki te fè sakrifis pou moun jwi dwa sa a antanke sitwayen.”

Pandan Rustamjon te nan prizon, li te kontinye bay lòt moun yon bèl temwayaj. Akoz bon konduit li te genyen, otorite nan prizon an te envite l patisipe nan yon fòmasyon espesyal, Inyon ewopeyen te soutni, pou ede prizonye yo jwenn travay apre yo fin lage. Apre fòmasyon an, administrasyon prizon an te bay Rustamjon yon sètifika ak yon lèt rekonesans pou travay di li te fè. Rustamjon fè konnen otorite yo di se paske li suiv prensip ki nan Bib la ki fè li gen bon konduit.

Anvan yo te lage Rustamjon, li pa t sèten nouvo lwa a t ap aplike nan ka pa l. Men, lòt prizonye yo te di yo kwè yo dwe lage l akoz bèl repitasyon li gen nan prizon an. Gen anpil nan otorite nan prizon an ki te di bon pawòl sou li tou.

Jèn Temwen ki fidèl, tankou Rustamjon, ki nan prizon paske yo kenbe fidelite yo e yo pa nan politik, kite “limyè [yo] briye devan lèzòm”. Sa k pi enpòtan an, “bèl aksyon” yo fè bay Jewova Dye onè ak louwanj. — Matye 5:16.