Nan dat 18 janvye 2021 an, yon tribinal nan peyi Tikmenistan kondane frè Artur Yangibayev pou l pase dezan nan prizon poutèt li pa vle fè sèvis militè akoz konsyans li. Se dezyèm fwa yo kondane l pou l al nan prizon pou kesyon sèvis militè li pa vle fè akoz lafwa l.

Artur Yangibayev

• Dat ak kote li fèt: 1997 (Seydi).

• Byografi: Lè Artur te timoun, li te fè fas ak kèk difikilte ki te pouse l mande tèt li poukisa gen tout enjistis sa yo nan monn nan. Li te pale sou sa ak yon sè l ki Temwen Jewova. Se konsa a 13 an, Arthur te kòmanse etidye Bib la. Li te batize an 2014.

  Li travay nan konstriksyon ak renovasyon kay. Paran Artur yo di li se yon moun ki janti e ki pran responsablite l oserye. Vwazen l yo respekte l paske l se yon moun ki onèt.

Nan dat 8 out 2016, yo te mete Artur nan detansyon prevantif poutèt li pa vle fè sèvis militè akoz konsyans li. Epi 30 out 2016, yo te kondane l pou l fè dezan nan yon kan travo fòse. Nan mwa septanm 2018, li te fini ak santans travo fòse a.

Sepandan, nan dat 15 desanm 2020 an, yo te rele l yon dezyèm fwa pou l fè sèvis militè. Yon ti tan apre, yo te rele l nan biwo komisè gouvènman an pou yo poze l kesyon, e yo te mande l pou l ekri yon lèt pou l esplike rezon ki fè l pa vle fè sèvis militè a.

Nan dat 30 desanm 2020 an, biwo komisè gouvènman an te fè l konnen yo ouvri yon dosye kriminèl kont li. Otorite yo te sezi paspò li.

Artur di apre yo te fin kondane l premye fwa a ‘Women 8:37-39 te fè l gen konfyans pèsonn pa ka anpeche l ret fidèl ak Jewova’. Nou konnen grasa èd Jewova, Artur ap rive andire eprèv sa a tou.