Nan dat 19 janvye 2021 an, yon tribinal nan Tikmenistan kondane frè Veniamin Gendjiyev pou dezan prizon poutèt li pa vle fè sèvis militè akoz konsyans li.

Veniamin Gendjiyev

• Dat ak kote li fèt: 2000 (Seydi).

• Byografi: Li leve nan yon fanmi Temwen Jewova. Li te vin pwoklamatè lè l te gen 15 an epi l te batize a 19 an. Li se yon moun ki janti e ki alèz pou l pale ak moun.

  Li te pran fòmasyon nan mekanik otomobil. Li renmen jwe gita. Kamarad lekòl li yo te konn fawouche l poutèt kwayans li. Li te aprann jan pou l defann kwayans li yo ki baze sou Bib la.

An jiyè 2018, yo te kondane frè Veniamin pou ennan prizon poutèt li pa vle fè sèvis militè akoz konsyans li. Yo te lage l 25 jen 2019.

Nan dat 25 desanm 2020 an, yo te konvoke l nan biwo komisè gouvènman ki nan distri Dyanev la. Otorite yo te mande l pou l ekri yon lèt pou l esplike rezon ki fè li pa vle fè sèvis militè a. Epi, 30 desanm 2020, biwo komisè gouvènman an te fè l konnen yo ouvri yon dezyèm dosye kriminèl kont li. Yo te sezi paspò l.

Men sa frè Veniamin di lè l reflechi sou premye fwa yo te kondane l pou al nan prizon an: “M te ka santi Jewova t ap soutni m. Li te ban m fòs, e lafwa m te vin pi djanm. M te priye Jewova e m te pataje bon nouvèl la ak lòt prizonye yo, sa te ede m lè m te santi m dekouraje.

“Pandan m te nan prizon an, gen moun ki pa t ka vizite m ki te mande paran m yo pou yo salye m pou yo. Fason yo te soutni m nan te ede m andire jiskaske m te kite prizon an.”

Youn nan vèsè ki te sitou bay frè Veniamin fòs se Ezayi 54:17. Li di: “Nenpòt zam yo fè kont ou pap itil anyen.” Vèsè tankou vèsè sa a ansanm ak lapriyè ap ede l andire nouvo tès sa a lafwa l ap sibi a.