“Lè m te priye Jewova, li te ede m rete kalm.” Se pawòl sa yo frè Selim Taganov te di apre yo te fin lage l sot nan prizon nan dat ki te 3 oktòb 2020 an. Selim gen sèlman 19 an, men li deja pase ennan nan prizon paske konsyans li pa pèmèt li al nan lame.

Selim te fèt nan vil Achgabat, kapital Tikmenistan. Lè l te piti, li te yon bon elèv e li te vin renmen mizik. Selim ekri chante, li chante e li jwe gita. Paran l ak de frè l yo pale de li kòm yon moun ki dou, ki janti e ki gen kè kontan. Anvan tribinal la te bay desizyon li pran an, men sa avoka tribinal la te bay Selim nan te di konsènan Selim: “Li se yon bon timoun, ki onèt, ki pa fimen e ki pa pran dwòg. Li fèk fini lekòl. Pase tan nan prizon ap jis detwi l kòm moun.”

Se sèten, li pa fasil pou moun viv nan prizon. Epoutan, men sa Selim di: “Pandan tan mwen pase nan prizon an, relasyon m ak Jewova vin pi solid. Mwen te sonje verite mwen te aprann nan Bib la, e mwen te kòmanse pi byen konprann yo. Lè m sonje vèsè tankou Ezayi 41:10, 11, sa ankouraje m tou.

“Lè m te kote yo te mete m anvan yo voye m nan prizon an, sa te difisil pou mwen paske mwen pa t gen moun pou m pale, pou m di jan m santi m. Men, mwen te priye Jewova pou l ede m. Apre m fin priye, prizonye yo ak gad yo, ki t ap mal boule avè m okòmansman, te kòmanse ede m e menm ankouraje m. Tout sa te ban m konviksyon Jewova t ap ede m.”

Yon bagay ki te bay Selim fòs tou se frè ak sè yo nan zòn nan. Men sa l di: “Lè m te nan prizon, anpil ladan yo te voye salye m epi di m yon seri bagay pou ankouraje m. Mwen te fè efò pou m sonje sa yo te di m yo, e apre sa mwen te reflechi sou yo. Sa te ban m fòs e sa te konsole m.”

Selon lalwa peyi Tikmenistan, yo ka rele Selim ankò pou l al nan lame. Si sa rive, Selim konnen yo ka kondane l pou l pase plis tan nan prizon. Men sa Selim di: “Lè m wè jan Jewova te ede m nan eprèv sa a, sa fè mwen pa pè okenn lòt eprèv mwen ka jwenn pi devan. Kòm mwen konnen Jewova avè m, sa ban m kouraj ak plis asirans.”

Nou tout konnen n ap jwenn eprèv alavni. Men ki ankourajman Selim ban nou: “Si nou gen pou n pase anba menm eprèv avè m, sonje pawòl ki nan Ezayi 30:15 lan ki di: ‘Si nou ret dousman e nou montre nou gen konfyans, se sa k ap fòs nou.’”