Nan dat 18 janvye 2021 an, yon tribinal nan Tikmenistan te bay desizyon l pran nan ka frè Azamatjan Narkuliyev la. Yo kondane l pou l pase dezan nan yon prizon ki gen anpil sekirite poutèt li refize fè sèvis militè akoz konsyans li. Se dezyèm fwa frè Narkuliyev pral nan prizon poutèt li pa vle patisipe nan zafè monn nan.

Azamatjan Narkuliyev

• Dat li fèt: 2000

• Byografi: Li batize an 2018. Yo konnen l kòm yon moun ki gen imilite, ki konn limit li e ki chofe nan travay predikasyon an. Manman l ak de sè l yo se Temwen Jewova tou

Nan dat 7 janvye 2020 an, yo te lage frè Azamatjan ki te nan prizon pandan ennan poutèt li te refize fè sèvis militè akoz konsyans li. Li gen 20 an. Nan Tikmenistan, yo kapab jije yon moun ki refize fè sèvis militè akoz konsyans li de fwa. Pou rezon sa a, senk mwa sèlman apre yo te fin lage frè Azamatjan, ofisyèl nan lame yo te rele l ankò pou l antre nan lame. Li te ekri yon lèt pou l fè konnen li pap antre ni nan lame ni nan gwoup ki nan lame a men ki pa pote zam yo. Yo te rejte demann li a fwa sa a tou.

Nan dat 20 desanm 2020 an, komisè gouvènman nan zòn nan te ouvri yon dosye kriminèl kont li. Otorite yo te sezi paspò l tou.

N ap priye pou frè Azamatjan ak fanmi l, paske nou konnen l ap jwenn anpil benediksyon dèske li pran detèminasyon pou l rete fidèl. Labib ban nou garanti “[Jewova ap] fidèl ak moun ki fidèl”. — Sòm 18:25.