Nan dat 6 out 2020 an, yon tribinal nan Tikmenistan kondane frè Eldor ak Sanjarbek Saburov pou yo pase dezan nan prizon paske yo refize fè sèvis militè akoz konsyans yo. Eldor gen 21 an, e Sanjarbek gen 25 an. Se de frè chanèl yo ye. Tribinal la rejte apèl yo te fè a. Se dezyèm fwa yo kondane yo akoz netralite yo.

An 2016, avèk respè, frè Sanjarbek Saburov te refize fè pati lame peyi a. Akoz de sa, yo te akize l e yo te kondane l pou l pase dezan sou siveyans.

Ane apre a, Eldor, ti frè Sanjarbek, te refize fè sèvis militè tou. Yo te kondane l pou l fè dezan travo fòse kote Leta ap pran 20 pousan nan sa l t ap touche.

Selon lwa peyi Tikmenistan, si yo te kondane yon moun deja paske l te refize fè sèvis militè e l kontinye refize fè sèvis la, yo kapab kondane l ankò pou menm rezon an. Ann avril 2020, biwo k ap anwole moun pou lame a te konvoke de frè yo ankò. Toude te refize antre nan lame. Yo te lage akizasyon kriminèl sou do yo, sa ki te lakòz yo mete yo nan prizon.

Mete yo mete mesye yo nan prizon an ap lakòz paran yo soufri nonsèlman nan domèn afektif, men tou nan lòt domèn ankò. Papa yo soufri ak doulè nan do, sa ki lakòz li pa ka travay. Timesye yo konn plante koton pou yo ede fanmi an. Kounye a yo nan prizon, paran yo pap jwenn èd yo nan domèn ekonomik ankò. Olye de sa, se paran yo k ap oblije ede yo jwenn sa yo bezwen pandan yo nan prizon an.

Tikmenistan pa bay posiblite pou moun fè sèvis sivil nan plas sèvis militè. Sa fè jèn frè ki refize fè sèvis militè akoz konsyans yo ap gen pou yo pase ennan jiska senkan nan prizon akoz netralite yo.

Nou konnen Jewova ap beni jèn frè nou yo nan Tikmenistan pou pozisyon yo pran avèk kouraj. Se pou yo chak kontinye sonje pwomès Jewova te fè wa Aza a: “Nou menm, mete gason sou nou, pinga nou dekouraje paske y ap rekonpanse n pou travay nou fè.” — 2 Kwonik 15:7.