Frè ak sè nan peyi Venezyela yo kontinye ap fè fas ak anpil pwoblèm akoz kriz ekonomik ak kriz politik ki genyen nan peyi a, san wete pandemi COVID-19 la. Malgre sa, yo te jwenn plizyè fason pou yo nonsèlman asiste Memoryal lanmò Kris la, men tou, pou yo envite lòt moun vin asiste l.

Pa egzanp, de semèn anvan Memoryal la, te gen gwoup ame ki t ap tire e ki t ap goumen nan La Victoria, nan Eta Apure, toupre fwontyè peyi Kolonbi. Tout pwoklamatè ki te nan zòn nan te oblije kouri al nan peyi Kolonbi. Frè ak sè nan peyi Kolonbi ki nan kongregasyon Arauquita te ede frè ak sè ki soti Venezyela yo pou yo konekte pou yo asiste Memoryal la.

Gen yon kongregasyon nan Eta Falcón ki nan yon zòn kote li difisil pou jwenn siyal pou Entènèt oswa pou telefòn. Donk, kongregasyon an te sèvi ak radyo kominikasyon pou yo bay diskou Memoryal la, e 70 pwoklamatè ki nan kongregasyon sa a te itilize mwayen sa a pou yo koute diskou a.

Gen yon sè ki di: “Se vre nou pa ka wè frè ak sè nou yo oswa bay youn lòt akolad, men kòm nou te ka tande vwa youn lòt, nou te ka santi se kòmsi nou te ansanm.”

Kèk jou anvan Memoryal la, kongregasyon yo te fè yon efò espesyal pou yo envite moun k ap viv nan zòn ki lwen nan peyi a pou yo koute pwogram nan. Te gen plizyè fason moun te ka tande diskou Memoryal la. E yo te voye plis pase 3 000 envitasyon. Sa te bay bon rezilta. Pa egzanp sou kot vil Araya, te gen plis pase 100 moun ki te koute diskou Memoryal la sou telefòn.

Filyal peyi Venezyela te fè aranjman tou pou yo pase Memoryal la sou 82 estasyon radyo ak nèf chèn televizyon. Te gen omwen 8 000 frè ak sè ak envite ki te asiste Memoryal la fason sa a. Yo te pase pwogram nan nan plizyè lang endijèn, tankou gwayibo, pemon, pyawowa, poume, warayo, wayounayiki ak yekwana.

Nan Guasipati, nan Eta Bolívar, yo te pwograme pou yo pase diskou Memoryal la sou yon estasyon radyo nan zòn nan apati 6 è 30 p.m. Malerezman, byen souvan anpil moun nan zòn sa a konn pa gen kouran. Sa vle di gen kèk moun ki pa t ap kapab koute tout diskou a. Men, te gen yon pwoblèm teknik nan estasyon radyo a, sa ki fè yo te kontinye pase diskou a plis pase dis fwa pandan nuit lan. Se sa k fè, moun yo te ka koute tout diskou Memoryal la nan diferan lè pandan nuit lan. Yo fè konnen te gen plis pase 600 moun ki te koute diskou a. Men sa yon frè di: “Jewova pa t vle okenn moun rate diskou espesyal sa a!”

Se vre frè ak sè nou yo gen ‘lapenn akoz divès eprèv yo jwenn’, men yo “kontan anpil” paske yo wè Jewova beni efò yo te fè pou yo asiste Memoryal la e pou yo envite lòt moun vin asiste l. — 1 Pyè 1:6, 7.