Nan dat ki te 10 avril 2022 a, frè John Hunguka, yon manm komite filyal peyi Zimbabwe, te fè konnen Tradiksyon monn nouvo a — Liv ki te ekri an grèk yo parèt nan lang chitonga (Zimbabwe) sou fòma elektwonik. Yo te anrejistre pwogram nan alavans epi pase l pou anviwon 500 moun. Tradiksyon an ap disponib sou fòma enprime an jiyè 2022.

Se moun Tonga yo sitou ki pale lang chitonga. Y ap viv nan nò peyi Zimbabwe ak nan pwovens ki nan sidès ak nan lwès peyi Zanbi. Labib — Tradiksyon monn nouvo a te parèt nan lang chitonga (yon lang ki sanble avè l yo pale nan peyi Zanbi) an 2014. Se premye fwa yo tradui Labib epi pibliye l nan lang chitonga (Zimbabwe). Anvan sa, moun ki pale lang chitonga yo pale nan peyi Zimbabwe a te oblije itilize tradiksyon ki nan lang chitonga yo pale nan peyi Zanbi a.

Se vre lang chitonga yo pale nan peyi Zanbi a sanble ak lang chitonga yo pale nan peyi Zimbabwe a, men gen gwo diferans nan sans kèk mo ak kèk fraz. Pa egzanp, nan Tradiksyon monn nouvo a — Liv ki te ekri an grèk yo ki te parèt nan lang chitonga yo pale nan peyi Zanbi a, 1 Jan 3:17 di yon kretyen dwe demontre konpasyon pou yon frè ki “nan bezwen”. Men, nan lang chitonga yo pale nan peyi Zimbabwe a, yo t ap konprann fraz sa a vle di yon frè ki “pèdi tèt li”. Ekip tradiksyon an te ranje fraz la pou l ka bay bon sans lan pou moun ki pale lang chitonga yo pale nan peyi Zimbabwe a.

Men sa youn nan tradiktè yo di: “Anvan sa, lè m t ap preche, mwen t ap gen pou m pase anpil tan ap eseye esplike moun m ap preche yo mo ki nan vèsè yo. Kounye a, mwen ka jis li vèsè a epi kite Pawòl Bondye a pale avèk yo.”

Nou kontan pou frè ak sè ki pale lang chitonga yo pale nan peyi Zimbabwe a, toutpandan y ap itilize nouvo tradiksyon sa a pou yo fè plis moun toujou ki byen dispoze konnen “chemen ki mennen nan lavi a”. — Sòm 16:11.