Èske moun ou marye avè l la fè w konnen li enkyete paske w bwè twòp alkòl? Si se sa, gen kèk bagay ou ta dwe egzamine.

Nan atik sa a

•  Bwè twòp alkòl lakòz gwo pwoblèm nan maryaj

•  Èske w esklav alkòl?

•  Fè atansyon pou w pa nye pwoblèm nan

•  Sa w ka fè

 Lè yon moun bwè twòp alkòl, sa ka lakòz li vin gen tout kalite pwoblèm sante, tankou maladi kè, siwoz fwa ak kansè. Men, bwè twòp alkòl pa sèlman lakòz pwoblèm sante, li lakòz pwoblèm nan maryaj tou paske vin gen plis chans pou moun ki bwè a fè vyolans sou lòt moun nan, pou vin gen pwoblèm kòb, pou vin gen adiltè e sa ka lakòz divòs.

 Bib la fè konnen bwè twòp alkòl “mòde tankou yon sèpan e li lage yon pwazon menm jan ak yon vipè”. (Pwovèb 23:32.) Ki jan w ap fè konnen si ou menm ou esklav alkòl?

 Kesyon ki annapre yo kapab ede w wè sa:

•   Èske l difisil pou w kontwole kantite alkòl ou bwè?

•   Èske sa rive souvan w ap panse ak pwochen fwa ou pral bwè alkòl?

•   Èske w kontinye bwè malgre pwoblèm sa lakòz ou genyen, san wete pwoblèm nan maryaj ou?

•   Lè w ap eseye kite bwè alkòl, èske w santi w pa byen?

•   Èske ou menm ak moun ou marye avè l la konn fè kont akoz kantite alkòl ou bwè?

•   Èske kò w vin ka tolere plis alkòl pase anvan?

•   Èske w konn bwè alkòl an kachèt lakay ou oswa nan travay ou?

 Si w reponn wi pou youn oswa plis nan kesyon sa yo, petèt ou vin esklav alkòl. Ou kapab gen yon pwoblèm yo rele alkolis, se lè yon moun gen pwoblèm pou l jere kantite alkòl li bwè menmsi l pa sou.

 Èske moun ou marye avè l la fè w konnen li enkyè pou ou pou jan w bwè? Si se sa, petèt ou eseye minimize pwoblèm nan oswa w toujou chèche eskiz. Petèt, ou konn blame lòt moun, san wete moun ou marye avè l la, lè w di yon seri pawòl tankou:

•   “Si w te aji pi byen avè m, mwen pa t ap bezwen bwè.”

•   “Si w te gen patwon m nan kòm patwon, ou t ap wè w bezwen bwè tou.”

•   “M konn yon pakèt lòt moun ki bwè plis pase m.”

 Si w konn di mòd pawòl sa yo, èske sa pa montre petèt ou bay anvi pou bwè a plis enpòtans pase anvi pou w gen kè kontan nan maryaj ou? Men, ki sa ki ta dwe pi enpòtan?

 Prensip biblik: “Gason ki marye a enkyete l […] [pou l konn] ki jan pou l fè madanm li plezi.” — 1 Korentyen 7:33.

•   Pran enkyetid moun ou marye avè l la an konsiderasyon. Menmsi moun ou marye avè l la gen tandans enkyete twòp pou sijè sa a, petèt ou ka fè kèk chanjman kanmenm. Si w pa kapab fè chanjman sa yo e si w kontinye bwè malgre sa enkyete moun ou marye avè l la, se kapab yon siy ki montre vrèmanvre alkòl se yon pwoblèm pou ou.

   Prensip biblik: “Se pou chak moun kontinye chèche, non pa pwòp avantaj pa l, men avantaj pa lòt moun.” — 1 Korentyen 10:24.

•   Chèche enfòmasyon. Pou yon sòlda genyen yon batay, li dwe konnen ki jan ènmi l lan ap atake l. Ou menm tou ou nan yon konba. Pou w pot laviktwa sou kesyon alkolis la, ki se yon ènmi pou ou, ou bezwen konnen ki sa l ye e ki jan li pran moun nan pyèj. W ap bezwen aprann tou ki sa w dwe fè pou w sispann esklav alkòl e pou w pa rekòmanse ankò.

   Prensip biblik: “Kontinye evite dezi lachè yo k ap fè lagè ak nou.” — 1 Pyè 2:11.

•   Chèche èd. Gen yon seri pwogram medikal yo mete sou pye pou ede moun ki gen pwoblèm ak alkòl, sa gen ladan l pwogram pou ede moun yo reprann yo, sant pou yo trete yo ak lopital. Epitou, ou ka mande yon zanmi w ki gen bon konprann pou l ede w wè ki lòt rezon ki fè w esklav alkòl. E lè w santi w anvi bwè ankò, rele moun sa a pou l ede w.

   Prensip biblik: “Yon bon zanmi demontre lanmou toutan e li se yon frè yo ka konte sou li lè gen malè.” — Pwovèb 17:17.

 Kesyon bwè twòp alkòl la se yon pwoblèm ki konplike, e ou pa ka rezoud li lè w annik li yon atik, oswa w annik di: “M ap eseye bwè mwens.” Men, ou dwe byen konprann fason w wè kesyon sa a gen efè sou sante fizik ou, men tou, li gen efè sou maryaj ou.

 Pou plis enfòmasyon: Li atik ki apre yo pou w wè ki jan lòt moun te rive jere pwoblèm bwè twòp alkòl la.

 “Je ne suis plus un homme brutal”

 “Mwen pa santi m wont tèt mwen ankò”

 “Lari a te vin tounen kay mwen”

 Epitou, gade videyo ‘Mwen te bouke ak fason m t ap viv la’