Se pa Bondye ki lakòz katastwòf natirèl yo ki rive jodi a, men li gen sousi pou moun ki viktim nan katastwòf sa yo. Wayòm Bondye a pral elimine tout sa ki lakòz moun ap soufri, sa ki gen ladan l katastwòf natirèl. Annatandan, Bondye rekonfòte moun sa yo ki viktim katastwòf natirèl. — 2 Korentyen 1:3.

•  Ki jan n ka gen asirans se pa Bondye ki lakòz katastwòf yo yon fason pou l pini lèzòm?

•  Èske katastwòf natirèl yo se siy n ap viv nan dènye jou yo?

•  Ki jan Bondye ede moun ki viktim katastwòf natirèl yo?

•  Èske Bib la ka ede n prepare pou yon katastwòf natirèl?

•  Kèk vèsè nan Bib la ki ka ede moun ki viktim katastwòf natirèl

 Bib la fè n konnen Bondye konn sèvi ak fòs natirèl yo pou l reyalize objektif li, men se pa Bondye ki lakòz katastwòf natirèl yo.

•   Katastwòf natirèl yo touye oswa blese tout kalite moun. Men, Bib la montre n lè Bondye sèvi ak fòs lanati yo kòm jijman, se sèlman moun mechan yo ki viktim. Pa egzanp, lè Bondye te detwi vil Sodòm ak Gomò, li te pèmèt Lòt ak de pitit fi l yo ret vivan (Jenèz 19:29, 30). Bondye te ka wè kè moun ki t ap viv nan epòk sa a e se moun ki mechan yo sèlman li te detwi. — Jenèz 18:23-32; 1 Samyèl 16:7.

•   Souvan katastwòf natirèl yo rive sanzatann oswa byen vit. Men, Bondye te avèti moun yo anvan l te sèvi ak fòs lanati yo kont yo. Moun ki te koute avètisman an te gen opòtinite pou yo evite katastwòf sa yo. — Jenèz 7:1-5; Matye 24:38, 39.

•   Gen nan katastwòf ki rive yo oswa ki fè plis dega yo se akoz desizyon oswa aksyon lèzòm. Ki jan? Se lè yo detwi anviwònman an e lè yo bati nan zòn ki konn gen tranblemanntè, inondasyon oswa move tan (Revelasyon 11:18). Se pa Bondye ki lakòz lè lèzòm pran move desizyon ki pote konsekans. — Pwovèb 19:3.

 Wi, pwofesi ki nan Bib la montre n t ap gen katastwòf nan “fen sistèm nan,” oswa “nan dènye jou yo”. (Matye 24:3; 2 Timote 3:1.) Pa egzanp, anrapò ak epòk nou an, Jezi te di: “Pral gen rate manje ak tranblemanntè nan yon zòn apre yon lòt.” ​(Matye 24:7). Talè konsa, Bondye pral elimine tout sa ki lakòz doulè ak soufrans, sa gen ladan l katastwòf natirèl yo. — Revelasyon 21:3, 4.

•   Bondye rekonfòte viktim yo pa mwayen Pawòl li a, Labib. Bib la ban nou asirans Bondye gen sousi pou nou e li santi l tris lè n ap soufri (Ezayi 63:9; 1 Pyè 5:6, 7). Mete sou sa, Bib la ede n aprann jan lavi a pral ye lè pap gen katastwòf natirèl ankò. — Gade “ Kèk vèsè nan Bib la ki ka ede moun ki viktim katastwòf natirèl”.

•   Bondye ede viktim yo pa mwayen sèvitè l yo. Bondye itilize sèvitè l yo ki sou tè a pou imite egzanp Jezi. Bib la te anonse Jezi t ap rekonfòte “moun kè yo ap fann yo” ak “tout moun ki nan lapenn”. (Ezayi 61:1, 2.) Sèvitè Bondye yo chèche fè menm bagay la tou. — Jan 13:15.

   Mete sou sa, Bondye itilize sèvitè l yo pou yo bay moun ki viktim yo bonjan èd lè gen katastwòf natirèl. — Travay 11:28-30; Galat 6:10.

 Wi. Se vre, yo pa t ekri Bib la sèlman nan objektif sa a, men li gen plizyè prensip ladan l ki kapab ede n prepare pou lè gen katastwòf. Pa egzanp:

•   Planifye alavans pou si ta gen yon katastwòf. Men sa Bib la di: “Moun ki gen lespri a wè danje a, li kache.” ​(Pwovèb 22:3). Li t ap saj pou n planifye alavans sa nou t ap fè si yon katastwòf ta rive. Planifikasyon sa yo ka gen ladan l prepare yon sak sekou ki pare pou si ta gen yon ijans e fè seyans pratik ak fanmi an pou n konnen kote n ap rankontre si ta gen yon katastwòf.

•   Bay lavi plis valè pase bagay materyèl. Men sa Bib la di: “Paske, nou pa t pote anyen nan monn nan, e nou pa ka ale ak anyen nonplis.” ​(1 Timote 6:7, 8). Nou dwe pare pou n kite kay nou ak bagay materyèl nou posede pou n kapab chape poul nou lè gen yon katastwòf. Se pou n sonje lavi nou pi enpòtan pase kèlkeswa bagay materyèl la. — Matye 6:25.