Li sa k te rive Karina a, epi imajine sa rive w tou. Ki sa ou menm ou t ap fè nan sitiyasyon sa a?

 Karina: “M t ap kondui twò vit yon lè pandan m pral lekòl. Konsa, yon polisye te fè m siy pou m kanpe e l te ban m yon kontravansyon. Sa te afekte m anpil! M te fè manman m konn sa e l te di m al di papa m sa, yon bagay m pa t anvi fè ditou.”

Ki sa ou menm ou t ap fè?

1.  Opsyon A: Pa di anyen, epi swete papa w pap janm konn sa.

2.  Opsyon B: Di papa w egzakteman sa k rive a.

 Ou te ka anvi chwazi opsyon A a. Dayè, petèt manman w ap jis panse w te fè papa w konn sa. Men, toujou gen bonjan rezon pou w rekonèt erè w fè, kit sa gen rapò ak yon kontravansyon oswa yon lòt bagay.

1.  1. Se pi bon bagay ou ka fè. Pou Bib la montre prensip tout kretyen dwe suiv, li di: “Nou vle konpòte nou yon fason ki dwat nan tout bagay.” — Ebre 13:18.

    “Mwen fè anpil gwo efò pou m montre m onèt, pou m responsab aksyon m yo e pou m admèt yon erè m fè tousuit mwen fin fè l.” — Alexis.

2.  2. Li pi fasil pou yo padone yon moun ki admèt erè l fè. Bib la di: “Moun ki kache peche l pap reyisi, men, moun ki konfese yo e ki pa fè yo ankò, y ap fè l mizèrikòd.” — Pwovèb 28:13.

    “Sa mande kouraj pou w admèt erè w fè, men, se konsa lòt moun ap rive fè w konfyans piske yo wè w se yon moun ki onèt. Lè w admèt yon erè, ou fè yon move bagay vin tounen yon bon bagay.” — Richard.

3.  3. Sa k pi enpòtan, sèke sa fè Jewova Dye plezi. Bib la di: “Jewova pa vle wè moun k ap fè sa k pa sa, men, li bon zanmi ak moun ki dwat.” — Pwovèb 3:32.

    “Apre m te fin fè yon erè grav, m te kòmanse rann mwen kont mwen bezwen fè lòt moun konn sa. Jewova pap beni m ditou si m pa fè bagay yo jan l vle a.” — Rachel.

 Ki jan bagay yo te fini pou Karina apre erè li te fè a? Li te eseye fè tout sa l kapab pou papa l pa konn si l te pran yon kontravansyon. Men, li pa t ka kache sa pou toutan. Men sa Karina di: “Anviwon ennan apre, pandan papa m t ap verifye dokiman asirans nou, li te remake m te pran yon kontravansyon. Konsa, m te vin nan gwo pwoblèm. Menm manman m te fache lefètke m pa t fè sa l te di m fè a!”

 Leson: Karina di: “Lè w kache erè w fè, sa toujou fè bagay yo vin pi mal. W ap peye sa yon lè kanmenm!”

 Tout moun konn fè erè (Women 3:23; 1 Jan 1:8). Men, jan n sot wè sa, lè yon moun rekonèt erè l fè san pèdi tan, sa montre l gen imilite ak matirite.

 Lòt etap la se aprann nan erè w yo. Malerezman, gen kèk jèn ki pa aprann nan erè yo lè yo jwenn okazyon an! Petèt yo ka santi yo menm jan ak yon jèn fi ki rele Priscilla. Men sa l di: “Erè m fè yo toujou fè m santi m vrèman dekouraje. Piske m pa fè tèt mwen konfyans, erè m yo vin tankou yon gwo pwa lou m pa ka pote. M tèlman konn santi m dekouraje, m konn di tèt mwen m se yon ka dezespere.”

 Èske w konn santi w konsa pafwa? Si se wi, sonje sa: Lè w ret ap reflechi ak erè w fè se kòmsi w t ap kondui yon machin epi w ret ap gade nan retwovizè a. Lè w ret konsantre sèlman sou sa k te pase w ap santi w pa vo anyen e sa ap fè w pa gen ase fòs pou w fè fas ak difikilte ki gen pou vini yo.

 Olye de sa, poukisa w pa eseye gen yon pwennvi ki pi ekilibre?

 “Reflechi ak erè w fè yo epi chèche aprann nan yo yon fason pou w pa refè yo. Men, pa ret konsantre twòp sou yo pou yo pa fin kraze w nèt.” — Elliot.

 “Mwen eseye konsidere erè m yo kòm yon eksperyans ki ka aprann mwen yon bagay. Nan chak erè m fè, m chèche aprann yon leson k ap ede m vin yon pi bon moun e k ap ede m jere sitiyasyon an yon lòt fason si m jwenn li ankò. Anfèt, se pi bon bagay m te ka fè paske sa ede m grandi.” — Vera.