“Paske, lespri sen Bondye ban nou an pa fè nou lach, men li te fè nou vin gen pisans, lanmou ak bonsans.” — 2 Timote 1:7, Tradiksyon monn nouvo a.

 “Paske, se pa yon Lespri kapon Bondye ban nou, men se yon Lespri pisans, lanmou, ak disiplin.” — 2 Timote 1:7, Bib Kreyòl La.

 Bondye ka ede yon moun met kouraj sou li pou l fè sa ki dwat. Bondye pa vle okenn moun vin “lach”, sa vle di pou yon moun gen yon kalite laperèz k ap anpeche l fè sa ki fè Bondye plezi.

 Ann egzamine twa kalite Bondye bay yo pale de li nan vèsè sa a k ap ede yon moun rive venk laperèz oswa pou l pa lach.

 “Pisans.” Sèvitè Bondye yo rive sèvi l avèk kouraj menm lè y ap fè fas ak anpil sitiyasyon oswa ènmi ki danjere. Yo pa moun ki kite laperèz fè yo fè bak (2 Korentyen 11:23-27). Ki sa k ede yo fè sa? Men ki esplikasyon apot Pòl bay sou sa: “Mwen gen fòs pou tout bagay grasa Sila a ki ban m pisans lan.” (Filipyen 4:13). Bondye kapab bay sèvitè l yo yon “pisans ki depase yon pisans nòmal” pou yo ka rive fè fas ak kèlkeswa pwoblèm yo jwenn. — 2 Korentyen 4:7.

 “Lanmou.” Gwo lanmou yon sèvitè Bondye gen pou Bondye ede l met kouraj sou li pou l fè sa ki dwat. Menm jan an tou, lanmou yon sèvitè Bondye gen pou lòt moun motive l pou l mete enterè lòt moun anvan entèrè pa l, menm lè l ap fè fas ak opozisyon oswa danje. — Jan 13:34; 15:13.

 “Bonsans.” Nan Bib la, an jeneral bonsans gen rapò ak kapasite yon sèvitè Bondye genyen pou l pran bon desizyon ki baze sou Bib la. Yon moun ki gen bonsans kapab panse yon fason ki klè e ki lojik, menm lè l ap fè fas ak pwoblèm. Li ka pran desizyon ki montre li wè bagay yo menm jan ak Bondye, toutpandan li konnen relasyon l ak Bondye pi enpòtan pase sa lòt moun panse.

 Se apot Pòl ki te ekri Dezyèm liv Timote a kòm yon lèt li voye pou Timote, bon zanmi l e konpayon travay li. Nan lèt sa a, apot Pòl te bay Timote, ki te yon jèn gason, bonjan ankourajman pou l kontinye travay di nan sèvis Bondye a (2 Timote 1:1, 2). Sanble Timote te yon ti jan timid, sa ki te ka fè l renka pou l fè yon seri aktivite nan kongregasyon kretyen an (1 Timote 4:12). Men, apot Pòl te fè Timote sonje li te resevwa yon don, sa vle di yon asiyasyon espesyal nan kongregasyon an. Li te ankouraje Timote pou l pa renka lè l ap sèvi ak otorite l antanke yon siveyan nan kongregasyon an, lè l ap preche bon nouvèl la, e lè l ap fè fas ak difikilte li jwenn akoz lafwa l. — 2 Timote 1:​6-8.

 Se vre, okòmansman yo te ekri pawòl sa yo pou Timote, men yo bay nou tout k ap sèvi Bondye jodi a asirans Bondye ap ban nou sa nou bezwen pou nou rive fè travay nou kèlkeswa difikilte nou rankontre.