Jou ki te 14 mas 2015 lan, elèv 138^yèm klas Lekòl Galaad la te gradye nan sant ansèyman Temwen Jewova yo ki nan Patèsonn, Nouyòk. Gen plis pase 14 000 moun ki te suiv pwogram nan an dirèk oswa grasa lyezon videyo plizyè lòt kote. Pwogram nan te kòmanse ak yon poz mizikal kote yo te pase kat nouvo kantik Wayòm epi, annapre, tout moun nan asistans lan te chante kantik sa yo *.

Se Geoffrey Jackson, yon manm Kolèj santral Temwen Jewova yo, ki te sèvi kòm prezidan pwogram nan. Nan pawòl entwodiksyon li yo, li te ankouraje elèv yo pou yo pa kenbe sa yo aprann yo pou yo, men, pou yo sèvi ak fòmasyon yo te resevwa a pou ede lòt moun.— 2 Timote 2:2.

Frè Jackson te pale sou egzanp Moyiz kite. Pandan yon tan, se tant Moyiz te abite a ki te sèvi kòm kote nasyon Izrayèl la te konn adore Bondye. Men, lè tabènak la te fin konstwi, se ladan l yo te konn vin pratike vrè adorasyon an. Sanble Moyiz pa t gen dwa antre Kote ki pi sen nan tabènak la, se gran prèt la ki te gen privilèj sa a. Sepandan, pa gen okenn kote nan Bib la ki montre Moyiz te konn plenyen pou chanjman sa a. Olye de sa, li te soutni Arawon fidèlman nan asiyasyon l te genyen antanke gran prèt la (Egzòd 33:7-11; 40:34, 35). Ki leson sa aprann? Frè Jackson te di: “Apresye kèlkeswa privilèj nou genyen, men, pa janm kenbe privilèj yo pou nou sèl.”

“Èske n ap kite bri yon fèy bwa fè n pè?” Sa a se tèm diskou frè Kenneth Flodin, youn nan frè k ap ede Komite ansèyman Kolèj santral la, te bay la. Li te fè konnen elèv yo ka rankontre kèk sitiyasyon ki gendwa fè yo pè, tankou pèsekisyon oswa asiyasyon ki difisil anpil. Li te sèvi ak yon ekspresyon ki soti nan Levitik 26:36 pou l ankouraje elèv yo pou yo konsidere sitiyasyon sa yo tankou yon senp fèy sèch, men, pou yo pa konsidere yo tankou yon bagay ki enposib pou yo sipòte. Apre sa, frè Flodin te atire atansyon sou egzanp apot Pòl ki te rive andire anba anpil pwoblèm paske l te fè Jewova konfyans. — 2 Korentyen 1:8, 10.

“Ki sa n ap chèche?” Se Mark Sanderson, yon manm Kolèj santral la, ki te bay diskou sa a. Li te pale de prensip nou jwenn nan Pwovèb 13:12 la ki di: “Lè yon moun ap tann yon bagay e sa pa rive lè l t ap tann li an, sa fè l pèdi espwa.” Malerezman, gen anpil moun ki santi yo desi pandan tout vi yo paske yo fikse lespri yo sou objektif yo ka pa janm atenn tankou vin rich oswa selèb.

Nan epòk Jezi a, gen kèk moun ki te atann anpil bagay ki pa sa konsènan Jan ki te konn batize moun nan (Lik 7:24-28). Pa egzanp, petèt yo t ap tann yon filozòf ki t apral fè yo plezi grasa yon seri ansèyman moun pa ka byen konprann. Si se sa, yo dwe te desi paske Jan te anseye yon mesaj ki chaje verite. Petèt gen lòt moun ki te atann pou l se yon moun ki enpresyonan nan fason l abiye. Men, rad Jan te abiye menm jan ak rad moun ki pòv yo. Sepandan, moun ki t ap tann yon pwofèt yo pa t desi paske nonsèlman Jan te yon pwofèt, men tou, se li menm ki te vin anvan Mesi ki t apral vini an! — Jan 1:29.

Kòm leson, frè Sanderson te ankouraje elèv yo pou yo chèche bon bagay la. Olye pou y ap chèche elòj oswa pou yo atann yon seri privilèj espesyal nan asiyasyon yo a, yo dwe fikse objektif pou yo sèvi ak fòmasyon yo resevwa a pou ede lòt moun. Yo ka rive fè sa lè yo pataje sa yo te aprann nan Galaad yo ak lòt moun, lè yo fòtifye lafwa frè ak sè yo ak lè yo demontre lanmou pou yo. Men sa frè Sanderson te di: “Avèk imilite, chèche vin sèvitè frè ak sè nou yo epi fè tout sa n kapab pou n fè volonte Jewova, konsa, nou pap janm desi.”

“Bay moun ki grangou yo manje.” Se tèm sa a James Cauthon, yon enstriktè nan Sèvis Lekòl teyokratik yo, te devlope. Frè Cauthon te fè konnen se tout moun ki bezwen pou lòt moun renmen yo, apresye yo epi ba yo enpòtans. Menm Jezi te gen bezwen sa a, e nan jou Jezi t ap batize a, Jewova te di kèk pawòl ankourajan pou l fè Jezi santi li renmen l, li apresye l e li ba l valè. — Matye 3:16, 17.

Jewova kreye n ak kapasite pou n ankouraje epi fòtifye lòt moun grasa pawòl nou e l atann pou n sèvi ak kapasite sa a (Pwovèb 3:27). Frè Cauthon te di: “Fòme tèt nou pou n aprann chèche sa ki byen lakay lòt moun, epi ezite felisite yo.” Lè n felisite kwayan parèy nou yo ak tout kè nou, sa ap fè yo konnen efò yo fè yo pa pou granmesi.

“Rive jis nan dènye gout la.” Se Mark Noumair, yon frè k ap bay èd nan Komite pou ansèyman an, ki te bay diskou sa a. Frè Noumair te sèvi ak egzanp apot Pòl pou l ede elèv yo konprann jan l enpòtan pou yo pa annik fè minimòm yo dwe fè a. Olye de sa, menm jan ak apot Pòl, y ap jwenn kè kontan toutbon si yo bay tout yo menm nan ede lòt moun. — Filipyen 2:17, 18.

Pòl pa t bay vag menm lè l te jwenn gwo pwoblèm. Etandone Pòl te kontinye bay tout li menm pou jis li mouri, nan yon sans, se kòmsi l te depanse l rive jis nan dènye gout la. Li te gen tout rezon pou l di: “Mwen kouri nan kous la jis mwen fini l.” (2 Timote 4:6, 7). Frè Noumair te ankouraje elèv yo pou yo imite Pòl lè yo soutni travay Wayòm nan fidèlman nan asiyasyon yo.

Eksperyans. Se Michael Burnett, yon lòt enstriktè nan lekòl Galaad, ki te fè patisipasyon sa a, e ladan l, gen kèk elèv ki te repwodui eksperyans yo te fè nan travay predikasyon an pandan yo Patèsonn.

Elèv yo te jwenn anpil bon rezilta lè yo te pwofite tout okazyon yo jwenn pou yo bay temwayaj ak lè yo te fè efò pou yo pataje mesaj verite a ak moun yo nan lang manman yo. Pa egzanp, gen yon elèv ki te aprann gen anpil moun ki pale espayòl nan tèritwa kote l te planifye pou l al preche a. Konsa, yon jou, anvan l soti preche, li te aprann kèk mo espayòl grasa aplikasyon JW Language la. Jou sa a, li te rankontre yon mesye nan lari a ki pale espayòl. Grasa kèk mo espayòl elèv la te aprann yo, li te kòmanse yon konvèsasyon ki te debouche sou yon etid Labib ak mesye a ansanm ak kat moun nan fanmi mesye a.

Entèvyou. Apre sa, William Turner Jr., yon frè k ap bay èd nan Komite sèvis Kolèj santral la, te entèvyouwe kat elèv konsènan eksperyans yo te fè anvan yo te vin Galaad e konsènan fòmasyon yo te resevwa nan lekòl la.

Elèv yo te pale sou kèk matyè nan pwogram kou yo ki te ankouraje yo. Pa egzanp, gen yon elèv ki te pale de sa l te aprann nan chapit 10 liv Lik. Swasanndis disip Jezi te voye yo te kontan lè yo te jwenn bon rezilta nan travay predikasyon an. Byenke Jezi te kontan tou, li te anseye disip li yo pou jwa yo a pa chita sèlman sou rezilta yo jwenn, men, yo ta dwe kontan sitou lefètke efò yo fè yo fè kè Jewova kontan. Sa fè n sonje kè kontan toutbon an pa depann de sitiyasyon nou, men l depann de favè Jewova.

Frè Turner te aplike pawòl ki nan Filipyen 1:6 yo sou elèv yo e l te ba yo asirans Jewova “kòmanse [fè] yon bon travay” nan yo e Jewova ap kontinye soutni yo.

“Kite je nou fikse sou Jewova.” Se Samuel Herd, yon manm Kolèj santral la, ki te fè diskou sa a ki se diskou prensipal pwogram nan. Li te rekonèt li enposib pou n wè Jewova ak je literal nou. Nan ka sa a, ki jan n ap fè je nou fikse sou li?

Youn nan fason nou kapab wè Jewova se lè n reflechi sou bagay li kreye yo ki aprann nou anpil bagay sou li. Mete sou sa, Jewova “ouvri kè nou e nou vin wè”. (Efezyen 1:18.) Plis nou li Bib la, se plis n ap aprann konn Jewova. E plis nou aprann konn Jewova, se plis n ap santi n pwòch avè l.

Li sitou enpòtan pou n etidye Levanjil yo paske yo ede n vin gen yon ide pi klè sou Jewova grasa pawòl Pitit gason l lan te di ak aksyon l te fè. Jezi te tèlman byen reflete pèsonalite Jewova, li te kapab di: “Moun ki wè m wè Papa a tou.” — Jan 14:9.

Frè Herd te ankouraje moun nan asistans lan nonsèlman pou yo chèche wè Jewova pa mwayen Jezi, men tou pou yo imite sa yo wè a. Pa egzanp, menm jan Jezi te fè tout sa l kapab pou l anseye lòt moun nan domèn espirityèl, nou vle fè tout sa n kapab pou n pataje sa n aprann yo ak lòt moun.

Ki sa n ap jwenn si n kite je nou fikse sou Jewova? Nou kapab vin gen menm konfyans ak yon salmis ki te di: “Mwen gen Jewova devan je m toutan. Piske li sou bò dwat mwen, mwen pap janm brannen.” — Sòm 16:8.

Konklizyon. Apre elèv yo te fin resevwa diplòm yo, youn nan yo te li yon lèt trè touchan ki eksprime apresyasyon yo. Apre sa, pou frè Jackson fini pwogram nan, li te di elèv yo pou yo pa santi yo dwe toujou anseye yon bagay ki nouvo oswa ki pwofon. Nan pifò ka, se raple y ap gen pou yo raple frè ak sè yo sa yo te deja konnen. Anplis de sa, frè Jackson te fè elèv yo sonje li enpòtan pou yo aji ak imilite. Elèv yo bezwen atire atansyon moun yo sou Bib la ansanm ak piblikasyon nou yo ki baze sou Bib la olye pou yo atire atansyon sou tèt yo oswa sou fòmasyon yo te jwenn Galaad la. Konsa, elèv yo pap dekouraje moun ki ka pa janm gen opòtinite asiste lekòl Galaad la, men, y ap ka ankouraje kwayan parèy yo lè yo ede yo byen pwofite manje espirityèl yo ka jwenn yo. Tout moun nan asistans lan te kite pwogram nan ak anpil ankourajman e yo te detèmine pou yo sèvi frè ak sè yo.