Sa gen senkantan, gen 583 Temwen Jewova ki te fè yon vwayaj ki t ap mennen yo nan lemonnantye. Vwayaj la t ap dire dis semèn. Yo pa t fè vwayaj sa a pou yo te annik vizite lòt peyi. Yo te fè l pou yo te ka reyini ak frè ak sè espirityèl yo, pou youn ankouraje lòt pandan seri asanble ki te fèt an 1963 a ki te gen tit: “Bon nouvèl etènèl la.” Kòm delege yo te vwayaje pou yo rankontre Temwen nan plis pase 20 peyi, yo te rele asanble sa yo “Asanble ki fè tou tè a”.

Yon diskou ki te make anpil moun nan asanble sa yo se sa ki te gen tit: “Lè Bondye ap wa sou tout tè a.” Se Nathan Knorr, ki te soti nan Syèj mondyal Temwen Jewova yo, ki te bay diskou sa a nan pifò asanble yo. Li te pale sou kondisyon monn nan k ap vin pi mal e li te montre diferans ki genyen ant kondisyon sa yo ak kokennchenn pwomès Bib la fè pou vin gen yon paradi sou tè a ankò. Te gen 580 509 moun antou ki te asiste diskou sa a nan lemonnantye.

Asanble yo te kòmanse Milwòki, nan Wiskonsin, Ozetazini. Apre sa, delege yo te ale nan direksyon lès. Apre asanble ki te fèt Nouyòk la, yo te pase Angletè, Syèd, Almay ak Itali. Chak kote sa yo, yo te jwenn posiblite pataje bon nouvèl ki nan Bib la ak moun yo.

Anpil moun te apresye tan Temwen Jewova yo te pran pou pale avè yo. Gen yon jèn fi nan vil Stokòm, an Syèd, ki te di: “Jis mwen mouri, m ap sonje vizit nou an. Èske se toutbon nou sot lwen konsa pou n vin pale avè m konsènan lafwa nou genyen nan Bondye? Nou vrèman estrawòdinè!”

Delege yo te yon ti jan desi lè yo te rive nan vil Atèn, an Grès. Gouvènman nan peyi sa a te pran nan presyon chèf relijyon yo te fè sou yo, yo te anile otorizasyon yo te bay pou asanble a fèt nan stad ki rele Panatinayikòs la. Men Temwen zele sa yo pa t kite sa dekouraje yo. Nan fen mwa out, prèske 10 000 moun te suiv pwogram nan ki te fèt nan kay prive ak nan kongregasyon ki nan zòn nan.

Apre delege yo sot Atèn, yo t al Liban, Jòdani, Izrayèl ak Chip. Kwayan parèy yo te byen resevwa yo, e pafwa menm gen kèk bagay enteresan ki te rive. Pa egzanp, nan vil Nikozi ki nan peyi Chip, youn nan delege yo te rakonte yon bagay dwòl ki te rive l. Men sa l te di: “Chak jou lè m tounen nan kay kote m te ye a, lè m te retire soulye nan pye m [...], apre yon ti tan, m pa t wè yo. Senk minit apre, m te konn jwenn yo byen pwòp e byen klere.”

Nan dènye pati vwayaj la, yo t ale ann Azi ak nan Pasifik la. Delege ki soti nan lòt peyi ak Temwen ki nan zòn sa yo te rete lakay frè ak sè nan diferan peyi ak vil tankou End, Bimani (ki rele Myanma kounye a), Tayilann, Hong Kong, Sengapou, Filipin, Endonezi, Ostrali, Taywann, Japon, Nouvèl Zelann, Fidji ak Kore. Anpil moun te ranje pwogram yo pou yo asiste asanble sa a, men se de jèn moun ki te fiyanse ki te soti Yokosouka nan Japon, ki te fè pi gwo chanjman nan pwogram yo. Lè gason an te mande patwon l jou pou l ka asiste asanble a, patwon an te di l se sèlman pou antèman ak maryaj yo bay jou konje konsa. Kòm li menm ak fiyanse l te deja deside y ap marye, yo te annik avanse dat maryaj la. Konsa, yo t al nan asanble a olye yo t al nan lindemyèl.

Vwayaj la te bout nan kòmansman mwa septanm lan ak asanble ki te fèt ann Awayi ak nan Kalifòni Ozetazini. Dènye kote yo te asiste asanble a se nan Pasadena, nan Kalifòni, e kantite moun ki te asiste asanble a te depase kantite yo te espere a. Sa te vin lakòz yon gwo blokis apre asanble a. Gen yon jounal nan zòn nan ki te rapòte sa chèf polis la te di lè l t ap gade jan moun yo te reyaji. Men sa l te di: “Se premye fwa m te wè moun te byen konpòte yo nan pwen sa a nan yon gwo rasanbleman konsa.”

Jis kounye a, n ap jwi byenfè asanble sa yo. Liv pou fè rechèch sou Bib la ki rele “Toute Écriture est inspirée de Dieu et utile” la te soti nan asanble sa a. E Temwen Jewova yo kontinye itilize l nan reyinyon yo jodi a.

Te gen yon nouvo chante ki te soti nan asanble sa a tou. Se frè Harold King, yon Temwen Jewova ki te fèk soti nan prizon an Chin an 1963 ki te ekri pawòl yo. Yo te rele chante a: “Pòt an pòt”. Harold King te ekri pawòl yo pandan li te nan kacho poukont li. Jodi a, Temwen Jewova yo kontinye chante chante sa a. Yo rele l “Kay an kay” kounye a.

Jodi a, kongrè Temwen Jewova yo fè yo diferan anpil. Yo sèvi ak lokal ki pi piti e konsa gen mwens moun nan chak kongrè. Lefètke vin gen plis lokal, sa fè moun k ap asiste asanble sa yo pa oblije ale lwen. Chanjman sa yo ansanm ak lòt ankò bay plis moun posiblite pou yo konsantre yo sou sa k ap di yo. Chak ane, plis pase sèt milyon Temwen Jewova ak moun yo envite yo asiste kongrè nou yo. Èske w pa ta renmen asiste kongrè avèk nou ane sa a? Chèche jwenn kote y ap fè kongrè ki pi pre lakay ou.