Elèv 134^yèm klas Lekòl Galaad yo te gradye nan samdi 9 mas 2013 la, nan sant fòmasyon Temwen Jewova yo genyen nan Patèsonn, Nouyòk. Lekòl sa a bay yon seri Temwen Jewova ki gen eksperyans fòmasyon pou yo ka vin pi efikas toujou nan asiyasyon yo. Te gen 9 912 moun ki te asiste pwogram nan e pami yo te gen zanmi ak fanmi elèv yo ak lòt envite ankò.

Se Mark Sanderson, yon manm Kolèj santral Temwen Jewova yo ki te prezide pwogram nan. Li te raple oditwa a sa fè 70 an depi yo te inogire Lekòl Galaad la nan dat 1^ye fevriye 1943. Nan okazyon sa a, frè ki te prezidan lekòl la, frè Nathan Knorr, te fè moun yo konnen ki objektif lekòl la vize: “Gen plizyè santèn oswa plizyè milye moun ki ta ka tande bon nouvèl Wayòm Bondye a si te gen plis travayè k ap travay nan chan an. Men grasa Seyè a, pral gen plis moun k ap tande.” Èske frè Knorr te gen rezon di sa?

Tande yon egzanp. Yon ti tan apre lekòl la te kòmanse, frè Knorr te vizite peyi Meksik pou l kapab wè ki kote yo te ka asiyen misyonè Galaad yo ki te jwenn fòmasyon. Pandan vizit li a, yo te envite nan yon reyinyon tout kongregasyon ki te nan zòn vil Meksiko, nan yon distans ki pa t depase 240 kilomèt. Te gen 400 moun ki te vin asiste. Si yo ta gen pou yo envite moun nan menm zòn nan nan yon reyinyon konsa jodi a, apre 70 an yo te voye nan peyi Meksik premye elèv ki te gradye nan Lekòl Galaad, se plis pase 200 000 moun ki t ap gen pou yo vini!

“Ki sa w gen nan men w la a?” Anthony Griffin, yon manm komite filyal peyi Etazini, te bay yon diskou ki te gen kòm tèm “Ki sa w gen nan men w la a?”, ki te baze sou Egzòd 4:2. Se Bondye ki poze Moyiz kesyon sa a nan istwa a. Moyiz te reponn: “Yon baton.” Jewova te sèvi ak baton sa a pou l fè moun konnen se Moyiz li te chwazi bay otorite ak misyon li te konfye l la (Egzòd 4:5). Moyiz te byen sèvi ak otorite l te genyen an pou l te bay Bondye glwa men, li pa t fè Bondye plezi lè l te sèvi ak otorite Bondye te ba li a pou l bay tèt li glwa e pou l blame frè l yo, jan l te fè sa nan “Meriba”. — Nonb 20:9-13.

Frè Griffin te konpare baton Moyiz la ak fòmasyon elèv Galaad yo te jwenn e li te ensiste pou yo pa sèvi avèk fòmasyon yo a pou yo chèche gen otorite sou frè ak sè yo. Olye pou yo ta fè sa, li konseye yo konsa: “Sèvi ak sa yo ba ou a pou w bay Jewova lwanj e pou w ba l onè, e w ap toujou yon benediksyon pou moun w ap sèvi yo.”

“Sonje lamàn nan.” Stephen Lett, yon manm Kolèj santral la, te site kat leson nou ka aprann nan mirak Bondye te fè pou Izrayelit yo nan dezè a, lè li te ba yo lamàn nan.

• Kontinye travay di (Nonb 11:8). Pou Izrayelit yo te ka pwofite lamàn nan, yo te dwe prese ranmase l anvan l te fonn, pou y al kuit li pou yo manje. — Egzòd 16:21.

• Pinga nou janm plenyen kont dispozisyon Jewova pran yo (Nonb 11:5, 6). Izrayelit yo t ap bougonnen sou lamàn nan men, Bondye te konsidere se kont li yo t ap plenyen. Se menm jan an, manje espirityèl nou resevwa a ka pa toujou parèt atiran men, l ap nouri nou kanmenm. Nou ta dwe toujou montre nou rekonesan pou tout dispozisyon Jewova pran yo.

• Toujou kwè Jewova ap fè w jwenn sa w bezwen. Bondye te fè yo jwenn lamàn chak jou san mank, jou apre jou, e li te fè yo jwenn de fwa sa yo te bezwen an nan jou ki te anvan saba a (Egzòd 16:22-26). Konsa tou, nou gen konfyans Jewova ap fè n jwenn sa n bezwen. — Matye 6:11.

• Dezobeyisans pa janm pote benediksyon (Egzòd 16:19, 20, 25-28). Sa te fè Jewova fache lè Izrayelit yo te chèche ranmase lamàn nan jou saba a. E nan senk lòt jou lasemèn yo, sila yo ki te ranmase l pou sere l pou demen te vin wè vè kale ladan l e li te vin santi.

Frè Lett te ankouraje elèv yo pou yo sonje leson nou ka aprann nan lamàn nan, konsa Jewova ap kapab “ouvri vàn ki nan syèl la pou nou pou [l] vide benediksyon sou nou jiskaske nou pa manke anyen”. — Malachi 3:10.

“Prepare nou pou lavi nan monn nouvo a.” William Samuelson, k ap sipèvize depatman ki rele Sèvis lekòl teyokratik yo, te esplike menmsi nou anvi viv nan monn nouvo a, sa k pi enpòtan an, se pare nou dwe pare pou n viv nan monn nouvo a, sa vle di pou n prepare tèt nou nan sans sa a. Sa mande “pou nou gen bonsans”. — 1 Pyè 4:7.

Nou montre nou gen bonsans nan fason nou wè pwòp enpèfeksyon nou yo. Nou pa ta dwe ap di se akoz Satan ak monn ki anba kontwòl li a ki fè nou gen tout defo nou genyen yo, e pou n ta panse se nan monn nouvo a n ap kapab korije defo sa yo lè Bondye pral retire tout move enfliyans ki genyen yo. Depi kounye a nou ka chèche “abiye ak nouvo pèsonalite a”, sa k ap pèmèt nou goumen kont defo nou yo, tankou tandans nou genyen pou n egoyis. — Efezyen 4:24.

“Depoze plim ou.” Mark Noumair, yon enstriktè nan Lekòl Galaad la, te sèvi ak egzanp yon plim ki reprezante libète nou genyen pou n “ekri pwòp objektif nou gen nan lavi a poukont nou.” Ebyen, nou ‘depoze plim nou’ lè n kite se Jewova ki gide n nan lavi a.

Egzanp Wa Sayil ka sèvi n avètisman nan sans sa a. Lè l te kòmanse dirije antanke wa, li te montre li se yon moun timid, enb, ki modès (1 Samyèl 10:22, 27; 11:13). Epi apre, li te kòmanse “ekri pwòp objektif li poukont li” lè l te kòmanse fè sa l te panse ki bon nan je l epi chèche glwa pou tèt li. Bondye te rejte l akoz dezobeyisans li. — 1 Samyèl 14:24; 15:10, 11.

Menm lè elèv yo montre yo fidèl jis rive jodi a, frè Noumair te fè yo sonje yo bezwen kontinye fè travay Bondye a jan Jewova vle l la. Li te bay elèv yo konsèy sa a: “Fè atansyon pou nou pa panse lefètke Jewova ap itilize nou an se favè l li ban nou.” Pa egzanp, Moyiz pa t suiv enstriksyon Bondye te ba li a, malgre li te fè yon mirak lè l te fè dlo soti nan yon wòch. Byenke li te jwenn rezilta, li pa t jwenn favè Jewova. — Nonm 20:7-12.

“Yo fè tande vwa zanj lan k ap vole nan mitan syèl la.” Sam Roberson ki se yon enstriktè nan Lekòl Galaad la, te sèvi ak Revelasyon 14:6, 7 pou l pale sou pwen sa a. Konsa, li te rakonte plizyè eksperyans predikasyon elèv yo te fè dènyèman. Pa egzanp, gen yon elèv, pandan l te nan lopital ap refè apre yon operasyon, ki te bay yon enfimyè nan lopital la temwayaj. Kòm enfimyè a te soti nan peyi Pewou, li te kòmanse konvèsasyon an avèk yon foto sou sit jw.org la, ki te montre pwoklamatè yo k ap preche nan yon vil yo rele Chachapoyas. Kòm rezilta, li menm ak mari l te vin etidye Labib ak Temwen yo.

“Ou twonpe m [...], wi, ou twonpe m.” (Jeremi 20:7). Allen Shuster, yon manm Komite filyal peyi Etazini, te fè entèvyou ak de koup marye ki te fè pati klas la. Elèv yo te di yo te santi Jewova te “twonpe” yo. Nan ki sans? Ebyen, okòmansman, lè yo te vin konnen yo t apral nan Lekòl la, yo pa t kwè yo t ap kapab fè fas ak egzijans sa t apral mande. Men, pandan yo nan Lekòl la, yo te sezi wè kantite èd yo te jwenn, sa ki te pèmèt yo reyisi. Sè Marianne Aronsson te montre jan li te apresye fòmasyon li te jwenn nan Lekòl la, men sa l te di: “Kounye a, m pap janm gen pwoblèm chwazi yon sijè pou m etidye, paske m vin reyalize chak vèsè nan Bib la se yon trezò.”

“Imite lafwa yo.” David Splane, yon manm nan Kolèj santral la, te bay diskou prensipal pwogram nan sou baz sa nou li nan Ebre 13:7, ki di: “Sonje moun k ap dirije nou yo, moun ki fè nou konnen pawòl Bondye a, e pandan n ap egzamine rezilta konduit yo, imite lafwa yo.” Ki jan “moun k ap dirije nou yo” te demontre yo te gen lafwa sa gen 70 an, nan travay yo t ap fè antanke reprezantan òganizasyon an?

Nan dat 24 septanm 1942, Nathan Knorr te dirije yon reyinyon avèk direktè de sosyete Temwen Jewova yo te konn itilize pou aktivite yo, e li te pwopoze pou yo mete an plas yon nouvo lekòl ki t ap rele Lekòl Galaad, ki t ap gen pou bay misyonè yo t ap voye nan nouvo tèritwa yo fòmasyon. Sepandan, nan epòk sa a, akoz sitiyasyon ki te gen nan monn nan, kondisyon yo pa t favorab pou mete lekòl sa a sou pye. Dezyèm gè mondyal la t ap fè raj, sa ki te fè l difisil pou yo voye misyonè nan plizyè peyi nan monn nan. Anplis de sa, sistèm ekonomik mondyal la te vin kraze nan ane 30 yo, sa ki te fè òganizasyon an te apèn gen ase lajan pou l fè lekòl la fonksyone pandan senkan. Epoutan, frè sa yo te demontre yo gen lafwa lè yo tout te apwouve pwojè a.

Elèv ki te gradye nan Lekòl Galaad yo nan premye ane li te fonksyone yo, te demontre yo gen lafwa tou, yon lafwa nou ka imite. Yo te aprann kontante yo ak sa yo genyen e yo te fè efò pou yo pa rete atache ak lajan (Ebre 13:5, 6). Gen anpil ladan yo ki pa t konn si yo t ap janm wè fanmi yo ankò, paske fanmi yo pa t gen mwayen pou peye yon vwayaj pou misyonè sa yo retounen lakay yo vin vizite yo. An reyalite, anpil nan misyonè sa yo pa t wè fanmi yo pandan 10 a 15 an apre yo te pati pou y al nan asiyasyon yo. Men, yo te gen konviksyon Jezi t ap kontinye pran swen yo menm ak fanmi yo jan li te toujou fè sa. — Ebre 13:8.

Apre frè Splane te fin bay kèk detay sou plizyè frè ak sè ki te sèvi aletranje nan sitiyasyon ki te difisil pou yo, menm anvan yo te vin asiste Lekòl Galaad la, li te di elèv yo: “Nou menm jèn gason ak jèn fi, nou vin fè pati bèl eritaj gason ak fi ki te patisipe nan Lekòl Galaad la kite pandan 70 lane ki sot pase la yo [...]. Nou te mèt kontan sèvi Jewova kèlkeswa kote nou ye.”

Frè Splane te fini patisipasyon l lan ak yon videyo ki te montre plizyè foto 77 elèv ki te gradye nan Lekòl Galaad la k ap sèvi kounye a nan filyal peyi Etazini, e pami yo te gen de ki te fè pati premye klas 1943 a. Yo te pase foto yo ak kantik Temwen Jewova yo konn chante pandan 70 dènye ane yo nan adorasyon y ap bay Bondye.

Apre elèv yo te jwenn diplòm yo, gen youn nan diplome yo ki te li yon lèt remèsiman klas la te ekri. Apre sa, frè Sanderson te di nan fen pwogram nan, byenke 70 an pase, sa frè Knorr te di elèv ki te nan premye klas la toujou gen anpil sans jodi a. Men sa l te di: “Kèlkeswa kote yo voye nou, sonje [...] se pwoklamatè Wayòm nan nou ye. Pa gen pi gwo privilèj pase pou yo ta bay yon kreyati sou tè a posiblite pou l louwe Bondye jodi a, anvan Amagedon rive [...]. Depi ou gen privilèj pou w preche, ebyen, preche.”