Men sa moun te ka li nan premye paj jounal Frankfurter Rundschau a: “Se te tankou yon fèt an fanmi.” Moun ki te asiste kongrè a te dakò ak sa.

Men sa Karla, ki soti Pòtoriko, te di: “Yo te fè m santi se kòmsi mwen te lakay mwen!”

Men sa Sarah, ki soti Ostrali, te di: “M te santi se kòmsi m t ap vizite pwòp fanmi m ki abite sou lòt bò tè a.”

Poukisa yo te santi yo byen konsa? Se akoz kongrè entènasyonal Temwen Jewova yo. Yo te fè l nan Commerzbank-Arena, nan vil Frankfòt ann Almay, soti 18 pou rive 20 jiyè 2014. Anviwon 37 000 moun te asiste kongrè a.

Moun yo te reyini pou yo aprann plis sou Bib la. Pwogram ansèyman an te gen ladan l lekti nan Bib la ak chante, moun yo te priye ansanm, te gen de dram yo jwe sou sèn ak dram odyo ki soti nan Bib la tou.

Asistans lan te gen ladan l Temwen Jewova k ap viv nan peyi a ak plis pase 3 000 delege ki te soti Afrik disid, Etazini, Grann Bretay, Lagrès, Liban, Ostrali ak Sèbi. Te gen 234 lòt Temwen, ki soti nan 70 peyi e ki nan sèvis spesyal aplentan tankou sèvis misyonè, ki te nan kongrè a tou.

Yo te transmèt kèk pati nan pwogram nan an dirèk pa mwayen Entènèt nan 19 lòt kote ann Almay, ansanm ak lòt kote nan peyi Laswis ak nan peyi Otrich. Kantite moun ki te asiste kongrè a antou se te 204 046.

Nan Frankfòt, yo te prezante pwogram nan ann alman, ann anglè ak nan lang grèk. Nan lòt kote yo, yo te tradui diksou yo an dirèk nan 17 lang, sa gen ladan l arab, chinwa, tamil, lang tik ak de lang siy.

Aktout Temwen yo te pale plizyè lang diferan e yo te soti nan plizyè peyi ak plizyè kilti, yo pa t divize. Lanmou te ini yo (Jan 13:34, 35). Yo te konsidere youn lòt tankou frè ak sè e se konsa yo te trete youn lòt.

Men sa Tobias, ki soti Grann Bretay, te di: “Nou te wè ak pwòp je nou fason fanmi entènasyonal nou an travèse tout fwontyè.”

Men sa Davianna, ki soti Pòtoriko, te di: “Mwen te kontre ak Temwen parèy mwen ki sot nan plis pase 20 peyi. Se lanmou nou gen pou Bondye e pou youn lòt ki ini nou.”

Men sa Malcom, yon delege ki soti Ostrali, te di: “M te vin Temwen Jewova nan yon ti vil tou piti. Mwen te konn li piblikasyon ki pale sou fanmi entènasyonal san parèy nou an e m te wè videyo sou sa. Men isit la, mwen te viv sa pèsonèlman. Sa te ede m konprann toutbon sa sa vle di. Sa vrèman fòtifye lafwa m lefètke m la.”

Gen Temwen Jewova ki te soti nan 58 kongregasyon ki ozalantou Frankfòt ki te prepare kado pou delege yo e ki te planifye aktivite nan aprèmidi pou yo tou.

Men sa Cynthia, ki soti Etazini, te di: “Nou te jwenn yon akèy ki san parèy. M pap janm bliye kalite lanmou, bonte ak jenewozite frè yo te demontre.”

Men sa Simon, k ap viv ann Almay, te fè konnen: “Te gen anpil lanmou, anpil kè kontan e frè yo te demontre anpil afeksyon pou nou. Nou ka aprann anpil bagay nan men youn lòt.

Men sa Amy, yon delege ki sot Ostrali, te remake: “Pwogram aprèmidi a te fè m wè antanke Temwen Jewova, nou pa viv tankou fanatik ki neglije tèt yo. Nou konn ki jan pou n amize n toutbon, yon fason ki pwòp.”

Kongrè Frankfòt la te youn nan yon seri kongrè entènasyonal yo te fè nan nèf peyi sou tè a.

Men ki sa yon delege te di, lè yo te mande l ki jan kongrè Frankfòt la te ye: “Imajine ou jwenn yon fanmi pwòch, yon frè pa egzanp, ou pa t konnen ou te genyen. Yonfwa ou jwenn li, li ouvri ni kè l ni kay li ba ou. Sa fè w santi w kontan anpil anpil. Kounye a miltipliye lajwa sa a pa 37 000. Se konsa sa te ye nan kongrè a.”