Apre yon dam nan peyi Ikrèn te tande frè Stephen Lett, yon manm Kolèj santral Temwen Jewova yo, ki fin li yon lèt enpòtan, men sa l te di: “Nou te santi kòmsi se nan lanmou nou t ap benyen.” Dam sa a te youn nan 165 000 Temwen ki t ap koute frè Lett lè l te vin vizite peyi a nan wikenn 10 me pou rive 11 me 2014.

Yo te entèprete lèt sa a li te li a ansanm ak plizyè diskou ki baze sou Bib la nan 5 lang, e yo te retransmèt pwogram nan nan anviwon 700 Sal Wayòm nan tout peyi Ikrèn.

Nan menm wikenn nan, Mark Sanderson ki se yon manm Kolèj santral la tou te li lèt sa a nan yon pwogram ki te fèt pou frè ak sè Larisi yo. Yo te entèprete pwogram sa a nan 14 lang e 180 413 frè ak sè nan plis pase 2 500 kongregasyon nan Belaris ak nan Larisi te gen posiblite suiv pwogram sa a anmenmtan grasa Entènèt.

Kolèj santral la te voye lèt la pou tout kongregasyon nan peyi Larisi ak nan peyi Ikrèn. Frè Sanderson te li l nan lang ris. Se sa k fè biwo filyal peyi Larisi a te ekri: “Sa te touche frè ak sè yo anpil dèske Kolèj santral la enterese konsa nan moun k ap viv nan zòn sa a. Nou tout te santi se kòmsi Kolèj santral la te ban nou yon gwo akolad.”

Yo te ekri lèt sa a pou yo ankouraje e pou yo fòtifye Temwen ki t ap fè fas ak pwoblèm politik nan zòn sa yo. Li te ankouraje frè yo pou yo kontinye “pa fè pati monn nan” lè yo pa mele nan zafè politik. — Jan 17:16.

Kolèj santral la te ankouraje Temwen sa yo pou yo kenbe yon bon relasyon ak Jewova lè yo priye Bondye e lè yo etidye epi medite sou Pawòl li. Li te fè yo sonje tou kèlkeswa eprèv yo rankontre, yo kapab gen konfyans nan pwomès san fay Jewova fè nan Ezayi 54:17, ki di: “Nenpòt zam yo fè kont ou pap itil anyen.”

Men dènye pawòl Kolèj santral la te mete nan lèt li te voye a: “Nou renmen nou anpil anpil. Nou mèt gen konfyans n ap toujou panse avèk nou e n ap sipliye Jewova pou nou nan priyè nou.”

Men sa biwo filyal Temwen Jewova nan peyi Ikrèn nan te di konsènan vizit sa yo: “Frè ak sè yo pa t atann yo Kolèj santral la t ap demontre lanmou ak bonjan enterè pou yo nan nivo sa a e yo vrèman rekonesan pou sa. Lefètke frè Lett ak frè Sanderson te vizite Ikrèn ak Larisi nan menm wikenn nan montre pèp Bondye a se yon pèp ki ini e sa montre frè ak sè yo jis nan ki pwen Jewova ak Jezi gen sousi pou yo. Nou tout dakò vizit la te fèt nan bon moman e n santi nou gen plis fòs pou n kontinye sèvi Jewova kèlkeswa pwoblèm nou ta jwenn.”