Nan jou ki te 13 septanm 2014, 137^yèm klas Lekòl Galaad la te gradye nan Sant ansèyman Temwen Jewova yo nan Patèsonn, Nouyòk. Lekòl sa a la pou fòme Temwen Jewova ki deja gen anpil eksperyans yon fason pou yo kapab vin pi kalifye pou yo bati kongregasyon yo ak filyal kote yo voye yo a. Te gen 12 333 moun ki te gade pwogram nan an dirèk, swa pèsonèlman nan Patèsonn, swa lòt kote ankò nan peyi Etazini, nan Kanada, Jamayik oswa Pòtoriko grasa koneksyon Entènèt.

Frè Samuel Herd, yon manm Kolèj santral Temwen Jewova yo, te sèvi kòm prezidan pwogram nan. Nan pawòl entwodiksyon l yo, li te atire atansyon sou jan fason Jewova panse depase fason nou panse (Ezayi 55:8, 9). Li te di elèv Galaad yo, menm apre yo fin pase senk mwa ap mete panse Bondye nan lespri yo, se sèlman “yon ti bagay nan sa [Bondye] fè yo” yo vin konnen (Jòb 26:14). Frè Herd te fè konnen chak fwa nou rasanble pou nou koute panse Bondye, nou jwenn byenfè, e se menm bagay la ki pral rive pandan pwogram gradyasyon sa a.

“Fwi lespri a se [...] pasyans.” (Galat 5:22). John Larson, yon manm Komite filyal peyi Etazini an, te pale sou de fason nou kapab montre nou gen pasyans, ki se yon aspè nan fwi lespri a. Premyèman, nou bezwen gen pasyans ak Jewova pandan l ap ban nou fòmasyon e l ap ede nou vin byen anrasinen nan lafwa (1 Pyè 5:10). Abraram kite yon bèl egzanp pou nou nan sans sa a. Li te montre li gen pasyans pandan Jewova t ap ba l fòmasyon. Finalman, Jewova te reyalize pwomès li te fè l la. — Ebre 6:15.

Dezyèmman, nou bezwen gen pasyans ak tèt nou. Apre elèv yo fin resevwa fòmasyon nan Lekòl Galaad, yo gendwa ap atann twòp de tèt yo. Si bagay yo pa mache jan yo ta renmen lè yo rive nan asiyasyon yo, yo gendwa mande tèt yo: ‘Èske se mwen ki pwoblèm nan?’ Sou baz eksperyans frè Larson te fè, li te bay elèv yo asirans y ap kapab fè fas ak defi yo pral jwenn yo si yo gen pasyans ak tèt yo e si yo kontinye travay di toutpandan Jewova ap fin fòme yo. — Ebre 6:11, 12.

“Se pou nou toujou gen imilite nan kè nou, konsa n ap viv pou toutan!” Frè Anthony Morris, yon manm Kolèj santral la, te baze tèm diskou l la sou Sòm 22:26. Dènye pati nan Sòm sa a, yo te ka tradui l mo pou mo konsa: “Se pou kè nou viv pou toutan.” Pou nou resevwa benediksyon sa a, nou dwe enb. Frè Morris te fè konprann si nou pa rete enb, Jewova pap ka sèvi avèk nou ankò. Kèlkeswa moun nan, menm moun ki gen lontan depi yo kretyen, ka bliye jan li enpòtan pou yo menm jan ak Jezi Kris. — 2 Pyè 1:9.

Bib la pale de moun ki te gen imilite ak moun ki pa t gen imilite. Ewòd Agripa te aksepte avèk awogans pou moun flate l e pou yo ba l glwa Bondye sèl merite. Se sa k fè yon zanj Bondye te frape l, sa ki te fè “yon seri vè fini avè l”. (Travay 12:21-23.) Yon lòt bò, sanble apot Pyè pa t bougonnen oswa fache lefètke Jezi te reprimande l lè l te di l: “Se pa panse Bondye ou gen nan tèt ou, men se panse lèzòm.” (Matye 16:21-23). Li te aksepte disiplin sa a e li kite yon bon egzanp nan domèn imilite. — 1 Pyè 5:5.

Gen kèk nan elèv yo ki pral sèvi nan filyal Temwen Jewova yo, e frè Morris te fè yo konnen si yo pa gen imilite, yo pap kontan nan asiyasyon sa a. Sepandan, li ka difisil pou n wè si n manke imilite. Pou l te ka ede elèv yo byen konprann sa, li te rakonte ki jan yo te konseye yon ansyen poutèt li pa t montre li gen imilite. Ansyen sa a te ekri filyal la, e men sa li te di nan lèt li a: “Mwen se moun ki pi enb mwen konnen.” Frè Morris te ankouraje elèv yo pou yo evite gen yon atitid konsa. Y ap rete enb si yo pa pran tèt yo pou yon pakèt afè lefètke yo ba yo otorite e si yo rekonèt se Jewova ak Kris Jezi ki gen otorite toutbonvre.

“Li ‘bay lespri l san mezire.’” (Jan 3:34). Michael Burnett, youn nan pwofesè nan Lekòl Galaad yo, te fè elèv yo sonje lespri sen ap ede yo fè fas ak difikilte yo rankontre nan asiyasyon yo oswa ak dout yo genyen. Lespri sen te ede Betsalèl fè fas ak difikilte li te rankontre nan asiyasyon l te genyen pou l bati tabènak la (Egzòd 35:30-35). Nonsèlman lespri sen te ogmante kapasite natirèl Betsalèl te deja genyen antanke yon atizan, men tou, li te pèmèt li anseye lòt moun. Lespri sen kapab gen menm efè a sou elèv yo, sitou si yo suiv sa yo te aprann nan Bib la pandan yo te nan lekòl la.

Nan epòk Betsalèl la, medam izrayelit yo tou te jwe yon wòl enpòtan nan bati tabènak la (Egzòd 35:25, 26). Menm jan an tou, sè ki nan Lekòl la demontre yo se “fi ki [...] fò nan travay yo” toutpandan y ap soutni mari yo. Frè Burnett te met fen nan diskou l la ak yon konsèy li te bay etidyan yo. Li te di: “Imilite ak obeyisans ap ede nou fè ekilib parapò ak kapasite nou gen lakay nou. Si nou gen imilite ak obeyisans, Jewova ap ban nou lespri sen l san mezire.”

“Èske w ap danse avè m?” Mark Noumair, youn nan frè k ap ede Komite pou ansèyman an, te devlope tèm sa a. Li te pran egzanp wa David, ki te mennen lach alyans lan Jerizalèm (2 Samyèl 6:12-14). Avèk imilite, David te danse ak kè kontan bò kote “sèvant mesye k ap travay avè l yo” pandan te gen moun ki t ap monte ak lach la (2 Samyèl 6:20-22). Se sèten sèvant sa yo pa t janm bliye wa David te danse ansanm avèk yo. Apre sa, frè Noumair mande elèv yo pou yo ‘danse ak sèvant yo’. Li te poze yo kesyon sa a: “Èske y ap konnen w kòm moun ki ede moun ki pa gen anpil responsablite yo oswa ki pa gen okenn responsablite yo? [...] Èske w ap apresye lòt moun pou bèl kalite yo genyen?”

Li te fè elèv yo konnen y ap imite Jewova si yo kontinye demontre yo gen lanmou fidèl nan fason sa a (Sòm 113:6, 7). Li te fè yo konnen tou menmsi gen moun bò kote yo ki pa montre yo enb, yo pa dwe kite enpèfeksyon lòt moun gen move enfliyans sou yo. Frè Noumair te di elèv yo: “Konsidere tèt nou kòmsi nou pa anyen.” Li te di yo tou: “Trete mouton Jewova yo menm jan Jewova t ap trete yo.”

“Bay temwayaj nan chak okazyon nou jwenn ki apwopriye.” Frè William Samuelson, ki se siveyan depatman Lekòl teyokratik yo, te pran apot Pòl kòm egzanp, antanke moun ki te pwofite tout okazyon li jwenn pou l preche bon nouvèl la (Travay 17:17). Apre sa, frè Samuelson te pale ak elèv yo toutpandan gen kèk frè ak sè ki t ap repwodui kèk eksperyans elèv yo te fè nan predikasyon pandan yo te nan lekòl la. Pa egzanp, gen yon frè ak madanm li ki te rankontre yon dam ki t ap travay nan yon makèt. Yo te ret tann jiskaske pa t gen kliyan ankò k ap pale ak dam nan, epi yo pase videyo ki gen tit Poukisa nou dwe etidye Labib? la pou li. Yo te atire atansyon dam nan tou sou sit jw.org la, kote li te kapab jwenn enfòmasyon nan Lawosyen, lang manman l. Frè a ansanm ak madanm li te gen posiblite pou yo tounen al pale ak dam nan.

“Kontinye rete disponib pou sèvis Wayòm nan” William Nonkes, yon frè ki travay nan Biwo sèvis filyal Etazini an, te fè entèvyou ak kat nan elèv yo. Ann amoni ak sa ki di nan Ezayi 6:8, yo deja rann tèt yo disponib pou yo travay pou fè enterè Wayòm nan avanse, men, lekòl la te ba yo fòmasyon pou yo fè sa plis toujou. Sè Snolia Maseko te fè konnen Lekòl Galaad te ede l wè kèk domèn kote li kapab pote amelyorasyon, sitou anrapò ak fason pou l byen sèvi ak tan l apre l fin pase tout jounen an nan travay predikasyon an. Li te di: “Fòmasyon mwen te jwenn nan fè m santi mwen kapab fè plis lontan pase sa m te panse.” Frè Dennis Nielsen te aprann ki jan panse ki nan Sofoni 3:17 la kapab ede l pou l pa dekouraje nan sèvis li. Li te di: “Si m ap preche e m pa jwenn bon rezilta, mwen bezwen sonje Jewova, bò kote pa l, ap rejwi tèlman li kontan, e mwen menm tou mwen bezwen fè menm jan an.”

“Gade zwazo nan syèl la byen.” (Matye 6:26). Stephen Lett, yon manm Kolèj santral la, te bay diskou prensipal pwogram nan. Sou baz yon ansèyman Jezi te bay kote l te di moun k ap koute l yo pou yo “gade zwazo nan syèl la byen”, sa vle di pou yo etidye yo byen, frè Lett te idantifye plizyè leson zwazo yo kapab anseye nou. — Jòb 12:7.

Pa egzanp, menm jan Jewova bay zwazo yo manje, l ap ban nou sa nou bezwen. Nou se moun ki “nan kay Bondye a”, e Bondye ban nou asirans l ap bay “moun ki sou kont li” sa yo bezwen (1 Timote 3:15; 5:8). Men, nou dwe jwe wòl pa nou. Menm jan zwazo yo dwe chèche manje Bondye ba yo a, se konsa tou nou bezwen “kontinye chèche Wayòm nan an premye” si nou vle Bondye beni nou. — Matye 6:33.

Frè Lett te fè konnen tou gen anpil zwazo ki fè bri pou yo bay avètisman lè yo santi yo an danje. Menm jan an tou, nou avèti lòt moun lè sa apwopriye. Pa egzanp, lè yon frè oswa yon sè “fè yon fo pa san l pa rann li kont”. (Galat 6:1.) Mete sou sa, travay predikasyon an ban nou posiblite pou n avèti moun yo konsènan “jou Jewova a” k ap pwoche ak tout vitès (Sofoni 1:14). Nan yon lòt egzanp frè Lett te pran, li te fè konnen menm jan ak zwazo ki vole anlè tèt gwo mòn lè y ap deplase, se konsa tou, grasa èd Jewova, nou rive fè fas ak yon seri pwoblèm nou ta gendwa panse pa gen solisyon pou yo. — Matye 17:20.

Konklizyon: Elèv yo resevwa diplòm yo, apre sa, youn nan elèv yo li yon lèt ki montre jan elèv yo rekonesan. Nan dènye remak frè Herd yo, li konpare efò nou fè pou n mete panse Jewova yo nan kè nou ak travay moun k ap plante gwo klou nan travès yo mete anba ray tren yo. Pou gwo klou sa yo byen chita nan plas yo, yo bezwen plizyè kout mato. Konsa tou, elèv ki gradye nan Lekòl Galaad yo bezwen kontinye reflechi sou sa yo aprann nan lekòl la. Frè Herd te di: “Pran tan pou nou plante bagay sa yo nan fon kè nou.” Apre sa, li di: “Si nou suiv panse Bondye yo, n ap yon benediksyon pou lòt moun.”