Depi plis pase 40 an, moun ki rete nan vil Nouyòk abitye wè gwo lèt wouj ki mezire 4,60 mèt wotè sou tèt syèj mondyal Temwen Jewova yo lajounen kou lannuit, e anpil nan yo konn gade ansèy sa a pou yo wè lè ak tanperati li fè.

Eboni ki rete nan yon apatman nan Bwouklin e ki ka wè ansèy la di: “Sa bon lè m gade nan fenèt mwen epi m ka wè ki lè l ye ak ki tanperati li fè anvan m soti al travay. Sa ede m pa anreta e sa ede m konn ki jan pou m abiye selon tanperati a.”

Èske ansèy sa a ki bay lè ak tanperati a ap la pou yon lòt 40 an ankò? Se pa sèten. Kòm Temwen Jewova yo ap planifye pou yo deplase syèj mondyal yo a pou yo mete l nan nò Eta Nouyòk, kounye a, se moun ki pral achte bilding nan k ap gen pou deside si l ap kenbe ansèy la oswa si l pap kenbe l.

Sa gen plis pase 70 an, moun ki te mèt bilding nan te mete yon ansèy. Lè Temwen Jewova yo te vin achte bilding nan nan ane 1969, yo te chanje ansèy la pou yo mete sa ki la kounye a.

Ansèy la te mande pou yo fè antretyen ladan l regilyèman. Gen plizyè jenerasyon jèn gason ki te travay sou li pou yo fè reparasyon ladan l kèlkeswa lè a.

Men sa yon moun ki travay nan nuit di: “Yon jou swa, gen direktè seksyon nouvèl nan yon televizyon ki rele. Li te rele pou l di nou revèy ki nan ansèy la te gen 15 segonn reta. Li te vle nou ranje l yon fason pou l te ka pale de li nan pwogram li menm aswè a. Yon ti tan apre sa, gen yon teknisyen ki t al travay pou ranje sa aktout li te gen dòmi nan je l.”

Pou ansèy la te ka pi efikas e pou l te ka pi egzak, yo te fè chanjman ladan l plizyè fwa. Nan mitan ane 1980 yo, anplis tanperati an Farennayt la ak lè a, yo te vin mete tanperati a an Sèlsiyis tou.

An 2009, yo te chanje anpoul neyon ki te nan ansèy la pou yo mete nouvo kalite ki pi bon e ki te pèmèt yo fè ekonomi 4 000 dola ameriken chak ane nan depans pou antretyen. Kounye a, ansèy la boule yon ti kal sèlman nan kouran li te konn boule anvan, sa ki fè li pi bon pou anviwònman an tou.