An 2015, prèske 175 000 moun te vizite biwo filyal Temwen Jewova yo nan Amerik santral la ki Meksik, sa vle di anviwon 670 moun chak jou nan semèn nan! Anpil nan vizitè yo te fè pati gwo gwoup ki te lwe bis e ki te fè plizyè jou nan wout. Gen nan yo ki te pase plizyè mwa ap planifye vwayaj la alavans.

Pou kèk nan vizitè yo, sa te mande anpil sakrifis pou yo vizite biwo filyal la ki rele Betèl. Pa egzanp, pifò nan moun nan kongregasyon ki nan eta Verakwouz la nan Meksik pa t gen ase lajan pou yo te peye pou vwayaj 550 kilomèt la nan bis. Donk, yo te òganize yon plan yo rele “Pwojè Betèl la.” Yo te òganize gwoup pou fè manje e pou vann manje a. Yo te ranmase boutèy plastik pou vann. Apre twa mwa, yo te gen ase lajan pou vwayaj la.

Èske l te vo lapenn pou yo fè tout travay sa a? Wi, yo te sèten. Pa egzanp, Lucio, ki se yon jèn nan kongregasyon an ekri: “Vizit nou an nan Betèl la te ankouraje m pou m gen plis objektif espirityèl, e kounye a m ap fè plis nan kongregasyon an.” Men sa yon jèn ki rele Elizabeth, ki gen 18 an di: “Nan Betèl la, m te ka vrèman wè e m te ka santi lanmou ki genyen ant moun k ap sèvi Jewova. Sa te motive m pou m bay Bondye plis, donk m te kòmanse nan sèvis aplentan.”

Gendelè, plizyè milye moun vin vizite nan menm jou a. Frè ak sè ki travay pou ede bay vizit yo travay di pou yo byen resevwa tout moun yo. Men sa Lizzy di: “Sa ankourajan pou m wè kantite moun ki vini. M vin gen plis lafwa lè m wè jan moun yo apresye vizit la e jan yo fè anpil sakrifis pou yo rive vizite biwo filyal la.”

Pou nou kapab resevwa tout moun ki vin vizite yo, moun ki gen lòt asiyasyon nan Betèl la bay vizit tou. Malgre sa vle di plis travay, yo renmen resevwa vizitè yo. Men sa Juan di: “Lè m fin bay yon vizit, m wè jan vizitè yo kontan e m konnen sa vo lapenn.”

Timoun yo tou renmen vizite Betèl. Men sa Noriko, ki travay nan biwo enfòmatik la, di: “M mande timoun nan gwoup k ap vizite yo si yo ta renmen sèvi nan Betèl. Yo toujou di ‘wi!’” Youn nan kote timoun yo pi renmen se “Kwen Kalèb la”. Yo ka pran foto ak gwo desen Kalèb ak Sofya, ki se de timoun nan desen anime nan videyo Fè zanmi ak Jewova a. Noriko ajoute: “Se pa ti renmen timoun yo pa renmen l.”

Anpil timoun di jan yo apresye travay ki fèt nan Betèl la. Pa egzanp, Henry, yon tigason nan peyi Meksik, te sere lajan nan yon ti bwat sekrè pou l te voye yon ofrann bay Betèl la. Li te ekri yon ti nòt avèk ofrann li an. Men sa l di: “Tanpri, sèvi ak lajan sa a pou n fè plis piblikasyon. Mèsi lefètke n ap travay pou Jewova.”

Temwen Jewova yo ofri moun vizit gide nan biwo yo ak enprimri yo toupatou sou tè a. Si w ta renmen vizite yon biwo filyal, nou envite w vini. Nou pa gen dout w ap kontan vizit la. W ap jwenn plis detay sou vizit nou yo nan ENFÒMASYON SOU NOU > VIZITE BIWO NOU YO.