Chak ane, plizyè milye moun al vizite biwo filyal nou yo Ozetazini ak syèj mondyal Temwen Jewova yo nan Nouyòk. Nou rele kote sa yo Betèl. Betèl se yon mo ebre ki vle di “Kay Bondye”. Moun soti tout kote pou yo vin wè ki jan nou fè piblikasyon nou yo, pou yo vin aprann ki jan n òganize travay n ap fè yo e pou yo vizite zanmi yo k ap viv lòtbò a. Gen yon moun ki te vrèman detèmine pou l fè yon vwayaj pou l ka vizite nou.

Moun sa a se Marcellus. Marcellus se yon Temwen Jewova k ap viv nan yon zòn nan Alaska ki rele Anchorage, Ozetazini, ki pa ka pale anpil paske sa gen kèk ane depi l te fè yon stwok *. Li deplase sou chèz woulant e l bezwen moun ede l fè tout sa l bezwen. Malgre tout pwoblèm sa yo, li te vrèman anvi vizite Betèl la. Sa pa gen twò lontan depi l reyalize rèv li te genyen an.

Men sa Corey, yon zanmi ki te ede Marcellus reyalize rèv sa a te di: “Li te vrèman tenas. Li te konn rele m regilyèman pou l konnen ki jan bagay yo ap mache. Piske Marcellus te ka reponn ‘Wi’ oswa ‘Non’ lè m ap pale avè l, mwen te oblije ap poze anpil kesyon lè l rele m.” Men ki jan konvèsasyon yo te konn plizoumwen dewoule:

“Ou ta renmen m al lakay ou?”

“Non.”

“Ou ta renmen m rele doktè a?”

“Non.”

“Ou anvi pale de vwayaj pou w al Betèl la?”

“Wi.”

“Apre sa, mwen te dwe esplike l ki sa k deja fèt pou vwayaj la. Mwen te vrèman kontan wè l atenn objektif sa a.”

Marcellus te venk plizyè obstak pou l te ka reyalize vwayaj sa a. Piske l pa t gen anpil lajan, li te sere lajan pandan dezan pou l te ka peye lajan vwayaj la, piske l te dwe fè yon distans 5400 kilomèt pou l al Nouyòk. Etandone kò l pa fin twò bon, li te oblije chèche yon konpayon vwayaj ki kapab ede l. Alafen, li te bezwen pèmisyon medsen l pou l fè vwayaj la e l te jwenn li sèlman kèk jou anvan l te fè rezèvasyon.

Lè Marcellus te rive Nouyòk, te gen gid ki te fè l vizite tout bilding Betèl la nan Bwouklin, Patèsonn ak Wòlkil. Li te wè gwo enprimant ki fè liv ak Bib e l te aprann anpil bagay sou fason nou òganize travay nou an. Li t al nan ekspozisyon ki gen tit “Bib la ak non Bondye” ak ekspozisyon ki gen tit “Yon pèp ki pote non Jewova”. Pandan vizit li a, li te fè anpil zanmi. Vrèmanvre, se yon vizit li pap janm bliye!

Gen anpil moun ki di yo pa gen mo pou yo esplike vizit yo fè nan Betèl la. Men, lè yo te mande Marcellus si sa te vo lapenn pou l vizite Betèl la, li reponn sèl fason l te kapab la: “Wi. Wi. Wi!”

Si ou menm ni fanmi w al vizite Betèl, sa ka yon eksperyans ki vrèman ankourajan pou nou menm jan sa te ye pou Marcellus. N ap byen kontan akeyi tout moun k ap vizite biwo filyal nou yo toupatou sou tè a. Poukisa w pa vin vizite nou?