Odval, yon dam k ap viv nan peyi Mongoli, pa fin sèten ki laj li genyen, men li panse li fèt an 1921. Lè l te toupiti, li te konn pran swen bèt paran l yo, e se sèlman ennan li te fè lekòl. Li pa konn li. Men, sa pa gen lontan, gen yon bwochi ki gen anpil imaj ki te ede l vin konn Bondye e ki te ede l konnen bèl avni k ap ret tann moun ki koute Bondye yo. Konesans sa a te touche kè l.

Gen de vèsyon nan bwochi sa a, e se Temwen Jewova yo ki te pibliye l an 2011. Toule de gen bèl imaj, men yo pa menm paske gen youn ki gen mwens pawòl pase lòt la.

Sa ki gen plis pawòl la ki rele Koute Bondye pou w viv pou toutan pral disponib talè konsa nan 583 lang, e lòt la ki rele Koute Bondye pral disponib nan 483 lang. Alòske rive oktòb 2013, yo te tradui Deklarasyon inivèsèl dwa de lòm nan 413 lang. Mete sou sa, yo gentan distribye prèske 80 milyon nan toule de bwochi sa yo.

Nan peyi Brezil, gen yon dam ki granmoun ki byen kontan resevwa bwochi Koute Bondye a, ki te di: “Mwen kontan konnen gen moun ki sousye de moun tankou m. Mwen pa t janm pran piblikasyon nan men nou paske mwen pa konn li. Men, mwen vle gen bwochi sa a.”

Brigitte, yon fi ki pa konn li k ap viv an Frans, di: “Chak jou, mwen gade imaj ki nan bwochi a.”

Men sa yon Temwen ann Afrik disid ekri: “Mwen pa jwenn yon pi bon bwochi pou m kòmanse pale sou laverite ak moun ki pale chinwa nan tèritwa a. Mwen pale ak tout kalite moun, ni moun ki gradye nan inivèsite, moun ki entèlijan anpil, ni moun ki apèn konn li. Bwochi Koute Bondye pou w viv pou toutan an ban m posiblite pou m anseye verite fondamantal ki nan Bib la byen vit. Nan 30 minit, mwen gentan poze baz.”

Gen de Temwen ann Almay k ap etidye ak yon mesye ak madanm li ki se moun ki gen gwo edikasyon. Bwochi a te fè gwo efè sou mari a, men sa l di: “Poukisa nou pa t ban m bwochi sa a pi bonè? Li ede m konprann evènman ak pawòl ki nan Bib la byen fasil.”

Gen yon dam ki soud nan peyi Ostrali ki di: “Mwen te viv nan kouvan ansanm ak mè pandan anpil ane. Mwen te pi pwòch dirijan legliz yo pase nenpòt lòt moun. Poutan, pa gen youn ladan yo ki fè m konnen sa Wayòm Bondye a ye. Imaj ki nan bwochi sa a ede m konprann sa Matye 6:10 vle di toutbon.”

Men sa filyal Temwen Jewova ki Kanada a ekri: “Gen anpil moun ki soti Syera Leyòn, lè yo wè bwochi Koute Bondye a nan lang kriyo ki fè konnen Temwen Jewova yo ap travay di toutbon pou yo pataje mesaj nan Bib la ak lòt moun. Gen kèk nan yo ki di: ‘Nou menm nou gen sousi pou moun, alòske gen anpil lòt moun ki pa konsa.’”