Moun toupatou nan monn nan konn li piblikasyon Temwen Jewova yo. Menm jan w ap fè sa kounye a la a, gen plizyè milyon moun k ap li piblikasyon sa a sou fòm elektwonik. Sepandan, ou ka sezi tande tout efò ki fèt pou n rive enprime piblikasyon nou yo. Depi 2013, nou pwodui piblikasyon ki baze sou Bib la nan anviwon 700 lang e n distribye yo nan 239 peyi.

Anvan ane 1920, se kèk antrepriz komèsyal ki te konn enprime tout piblikasyon nou yo pou nou. Nan ane sa a, nou te kòmanse enprime kèk nan peryodik ak bwochi nou yo nan yon ti lokal nou te lwe nan Bwouklin, Nouyòk. Nou te kòmanse toupiti, men kounye a, nou enprime nan 15 lokal ki twouve yo ann Afrik, ann Amerik dinò, ann Amerik disid, ann Azi, ann Ewòp ak ann Ostrali.

Nòmalman, liv ki pi enpòtan nou enprime a se Labib. An 1942, premye bib antye nou te enprime a se te tradiksyon Labib Wa Jak la (anglè). Apati 1961, Temwen Jewova yo te fè tradiksyon Labib — Tradiksyon monn nouvo a e yo te pibliye l nan yon sèl volim. Depi 2013, nou rive pwodui plis pase 184 milyon nan tradiksyon sa a nan 121 lang.

Se pa kantite a sèlman ki konte. Bib nou enprime yo fèt pou yo dire anpil tan tou. Nou enprime paj yo sou yon papye ki pa gen asid pou yo ka pa vin jòn e paj yo byen kole youn ak lòt. Kòm rezilta, nou vin gen yon bib k ap ret an bon eta menm lè yo itilize l chak jou.

Mete sou sa, nou enprime piblikasyon pou ede moun yo konprann Labib. Ann konsidere kèk chif pou ane 2013 la:

• Toudegad, prensipal peryodik nou pibliye a, se peryodik ki plis pibliye nan monn nan e nou enprime l nan plis pase 210 lang. Nou enprime anviwon 45 000 000 nan chak nimewo ki gen 16 paj yo.

• Reveye n!, peryodik ki mache ak Toudegad la, se dezyèm peryodik ki plis pibliye apre Toudegad e l disponib nan 99 lang. Nou enprime anviwon 44 000 000 nan chak nimewo.

• Ki sa Labib anseye toutbonvre? se yon liv ki gen 224 paj e ki gen po mou. Nou fè l nan objektif pou n ede moun konprann ansèyman fondamantal Bib la. Depi 2005, nou enprime plis pase 214 milyon liv sa a nan plis pase 240 lang.

• Koute Bondye se yon bwochi 32 paj nou fè pou n ede moun ki pa ka li byen. Li esplike verite ki nan Bib la yon fason senp grasa bèl foto ak mesaj tou kout ki ladan l yo. Nou te enprime plis pase 42 milyon ladan l nan plis pase 400 lang.

Anplis de piblikasyon sa yo, Temwen Jewova yo enprime yon pakèt liv, bwochi ak feyè pou ede etidyan Labib yo fè rechèch sou kesyon biblik yo, fè fas ak pwoblèm lavi a epi viv ak kè kontan nan fanmi yo. An 2012, Temwen Jewova yo te rive enprime plis pase 1.3 milya peryodik ak 80 milyon liv ak Bib.

Byen souvan, moun k ap vizite enprimri nou yo konn sezi wè jan moun k ap enprime piblikasyon sa yo konn travay di. Tout gason ak fi sa yo se moun ki bay tan yo ak enèji yo. Lè yo te fèk vin nan Betèl, yon mo ki vle di “Kay Bondye”, pifò nan yo pa t gen okenn eksperyans nan zafè enprimri. Sepandan, fòmasyon yo ba yo nan Betèl la ansanm ak anbyans kote y ap travay la ki ede moun pran fòmasyon, bay bon rezilta. Pa egzanp, byen souvan nou wè yon seri jèn ki gen 20 an k ap travay sou enprimri ki gen anpil vitès ki kapab enprime 200 000 kopi nan yon peryodik ki gen 16 paj nan inèdtan.

Toupatou nan monn nan, se ofrann volontè ki soutni travay Temwen Jewova yo. Men sa Toudegad Siyon an ki te parèt nan mwa out 1979 (anglè), kounye a yo rele Toudegad, te fè konnen: “Nou kwè se JEWOVA k ap soutni ‘Toudegad Siyon an’, e toutotan se konsa sa ye, peryodik sa a pap janm mande lèzòm èd pou soutni l.” Nou toujou ret kwè sa.

Poukisa nou pase tout tan sa a, nou depanse tout lajan sa a ak tout efò sa a pou travay sa a? Se paske kit ou li youn nan plizyè milyon Bib ak liv nou yo sou fòm enprime, kit ou li yo sou Entènèt, nou espere piblikasyon sa yo ap ede w vin pi pwòch ak Bondye.