An janvye 2013, sa te fè 40 ane depi y ap pibliye Toudegad nan lang gwennlandè. Se pèp Inuit la ki pale lang gwennlandè a e se sèlman 57 000 moun ki pale l.

Gen anviwon 150 Temwen Jewova sèlman nan peyi Gwennlann. Men yo distribye 2 300 kopi Toudegad nan lang gwennlandè. Sa vle di pifò moun ki li Toudegad, yo rele Napasuliaq Alapernaarsuiffik nan lang gwennlandè, pa Temwen Jewova.

Nan yon entèvyou yo t ap fè nan televizyon, siveyan biwo tradiksyon ki nan vil Nouwouk la te esplike: “Gen anpil Gwennlandè ki enterese nan Labib. E se poutèt sa yo li Napasuliaq Alapernaarsuiffik la (Toudegad).”

Lè moun ki t ap poze kesyon an mande youn nan tradiktè gwennlandè yo, ki se yon fi, ki sa li menm li renmen nan jounal la, li te reponn: “Mwen jwenn anpil byenfè Iè m li jounal sa a. Pa egzanp, li fè m wè fason pou m viv an sante. M te konn fimen sigarèt anpil, menm lè m te konnen li pa t bon pou sante. Men, Bib la di nou si nou vle viv an sante, nou ta dwe kenbe kò nou pwòp.”

Emisyon sa a tou te fè konnen Temwen Jewova yo te kòmanse aktivite yo nan peyi Gwennlann nan mitan ane 1950. Yo pibliye liv ak bwochi nan lang gwennlandè. Travay tradiksyon ki fèt ni nan lang danwa a ni nan lang gwennlandè a se volontè ki fè l, e objektif yo se toujou fè tradiksyon gwennlandè a parèt natirèl e orijinal.

Yon moun ki Temwen Jewova lontan te di: “Sa fè 25 ane depi m ap bay moun nan peyi Gwennlann temwayaj. M wè jan sa enpòtan pou yo gen jounal nan lang pa yo. Gen kèk zòn ki lwen, se nan bato sèlman nou ka ale ladan yo kèk mwa nan ane a. Gen moun nan zòn sa yo ki renmen li jounal nou yo. Donk, menm lè nou pa vizite yo souvan, nou toujou voye lèt ak jounal pou yo.”

Depi janvye 2013, yo pibliye Toudegad edisyon etid ak Toudegad piblik regilyèman nan lang gwennlandè. Epi ou kapab li oubyen telechaje Toudegad sa yo lè w ale nan ribrik “Piblikasyon” sou jw.org, ou chwazi lang gwennlandè epi w klike “chèche”.