Si w klike nan lis lang jw.org la ki parèt nan paj sa a, w ap jwenn li gen plis pase 300 lang ladan l. Ou pap jwenn okenn lòt sit konsa sou Entènèt!

E si n konpare kantite sa a ak lòt sit tout moun byen konnen yo? Fè yon ti reflechi: Nan mwa jiyè 2013 la, sit Entènèt Nasyonzini an te disponib nan sis lang. Sit Entènèt ofisyèl Inyon Ewopeyèn nan ki rele Europa te disponib nan 24 lang. Google te disponib nan 71 lang, alòske Wikipedia li menm te disponib nan 287 lang.

Sa mande anpil èdtan travay pou yo rive tradui yon sit Entènèt nan plis pase 300 lang! Se plizyè santèn Temwen Jewova toupatou sou tè a ki vle fè louwanj pou Jewova ki te fè pifò nan travay sa a. Pou chak lang, yo travay antanke ekip ki òganize, yo sèvi ak kapasite yo pou yo tradui tèks anglè a.

JW.ORG gen anpil paj enfòmasyon yo tradui nan plis pase 300 lang. Se sa k fè, kantite paj ki gen sou sit la vrèman anpil, yo depase 200 000 paj!

JW.ORG pa sèlman yon sit ki disponib tout kote, men, moun yo al sou li anpil tou. Sa parèt klè nan klasman yon antrepriz ki rele Alexa, yon sit k ap analize konbyen moun ki vizite sit Entènèt yo nan lemonnantye, te fè. Nan kategori “Relijyon ak espirityalite” ki parèt nan klasman sa a, gen yon lis ki gen anviwon 87 000 sit Entènèt, sa ki gen ladan l pi gwo relijyon nan monn nan san wete sit k ap ekri sou relijyon yo ansanm lòt òganizasyon ki menm jan an. An jiyè 2013, jw.org te an dezyèm pozisyon nan lis sa a! Sit ki parèt an premye a se yon sit komèsyal ki bay aksè ak yon pakèt tradiksyon Labib sou Entènèt.

Nan mwa oktòb 2013 la, chak jou, plis pase 890 000 moun t al sou sit JW.ORG la. N ap kontinye travay pou n pèmèt moun tout kote jwenn bonjan enfòmasyon sou Bib la gratis.