“Li fè w anvi koute, li fè w reflechi e l vrèman enteresan.”

“Li fè lekti Labib la vivan.”

“Li vrèman enteresan! Li met santiman nan yon seri lekti Labib mwen abitye tande pandan tout vi m.”

Se kòmantè konsa moun ki deja koute anrejistreman liv Matye a sou fòm odyo fè, anrejistreman sa a disponib sou sit jw.org la ann anglè.

Temwen Jewova yo te kòmanse pwodui premye anrejistreman Labib sou fòm odyo nan ane 1978. Avèk letan, yo te distribye anrejistreman odyo vèsyon bib sa a, ann antye oswa an pati, nan 20 lang.

Lè edisyon revize Tradiksyon monn nouvo a te parèt nan ane 2013, sa te vin fè l nesesè pou yo met anrejistreman odyo Bib la ajou. Men, kontrèman ak premye anrejistreman odyo a ki te gen vwa twa lektè ladan l, nan nouvo anrejistreman an, ap gen yon lektè diferan pou chak pèsonaj biblik e gen plis pase 1000 pèsonaj biblik.

Piske ap gen tout diferan lektè sa yo, sa ap pèmèt moun k ap koute anrejistreman yo pi byen imajine sa k te pase nan istwa biblik yo. Byenke anrejistreman sa yo pa lekti Labib sou fòm dram ki gen efè espesyal ak mizik, yo fè istwa yo vin pi reyèl pou moun k ap koute yo.

Yon pwojè ki gen tout lektè sa yo mande bonjan planifikasyon. Pou kòmanse, frè ak sè k ap fè rechèch yo te bezwen idantifye ki moun k ap pale nan chak pasaj e ki emosyon yo dwe bay pou chak moun. Pa egzanp, si yon apot ap pale, men pasaj la pa di byen klè kiyès k ap pale a, vwa ki apot y ap itilize? Si pawòl apot la montre l gen dout, yo ka itilize vwa Toma, epi si pawòl apot la montre l gen kè cho, yo ka itilize vwa apot Pyè.

Epitou, yo te oblije reflechi ak laj pèsonaj biblik yo. Pou yo ka bay vwa apot Jan lè l te jèn, yo te bezwen itilize vwa yon lektè ki jèn. Men, pou yo ka bay vwa apot Jan lè l fin granmoun, yo itilize vwa yon gason ki granmoun.

Mete sou sa, yo te bezwen moun ki konn li byen. Yo te chwazi pifò ladan yo nan biwo filyal Temwen Jewova yo Ozetazini. Yo fè yon seri tès kote yo mande lektè yo panse itilize yo pou yo prepare yon paragraf nan yon atik Reveye n! e pou yo vin li l nan stidyo. Epi, yo fè yo li kèk liy nan yon konvèsasyon nan Bib la ki gen emosyon tankou kòlè, tristès, lajwa, oswa dekourajman ladan l. Tès sa yo pèmèt yo evalye kapasite lektè yo e yo ede yo wè ki jan yo ka itilize chak lektè.

Yonfwa lektè yo fin resevwa asiyasyon yo, y al nan youn nan stidyo anrejistreman nan Bwouklin oswa nan Patèsonn, kote y ap anrejistre pati y ap li a. Gen yon kotch ki la pou l asire l lektè a li ak yon bon ton, oswa l gen yon bon kalite vwa. Kotch la ak lektè a itilize yon maniskri espesyal yo prepare pou yo ki bay enstriksyon sou ki lè pou yo fè poz e ki kote pou yo met aksan nan chak pasaj. Mete sou sa, kotch la itilize anrejistreman premye edisyon Tradiksyon monn nouvo a kòm modèl.

Yo edite fichye odyo yo pandan y ap fè anrejistreman yo. Pou yo rive bay yon pi bon travay, pafwa, frè k ap netwaye fichye odyo yo konn oblije kole kèk mo oswa kèk fraz yo pran nan plizyè lòt pati ki deja anrejistre.

Nou pa konn konbyen tan sa ap pran pou n fin anrejistre tout edisyon revize Tradiksyon monn nouvo a. Sepandan, chak fwa yo fin anrejistre yon liv, y ap mete l sou sit jw.org la, epi ap gen yon ti ikón bò kot non liv la nan paj ki gen tit: “Liv ki gen nan Bib la.”