Li vrèman difisil pou tradui chante nan yon lòt lang. Li pi difisil toujou pou tradui yon liv ki gen 135 chante.

Temwen Jewova yo te pran angajman pou yo fè travay sa a e yo te rive fini l. Nan twazan, yo te tradui nouvo liv chante yo a, Ann chante pou Jewova, nan 116 lang. Gen 55 lòt lang ki gen yon vèsyon liv la ki gen 55 chante. Y ap travay pou yo tradui l nan plizyè douzèn lòt lang.

Temwen Jewova yo deja tradui piblikasyon ki baze sou Bib la nan anviwon 600 lang, e anviwon 400 ladan yo disponib sou Entènèt. Men, tradiksyon liv kantik la te vrèman difisil. Sa k fè sa? Se paske melodi nan liv Ann chante pou Jewova a pa chanje, menm lè yo tradui pawòl yo nan anpil lang.

Lè y ap chwazi pawòl pou yon chante, se pa menm bagay ak lè y ap tradui yon tèks pou yon peryodik. Pa egzanp, lè tradiktè yo ap tradui Toudegad, yo fè efò pou yo tradui tout sans tèks la genyen nan lang yo te ekri l la. Men, mizik diferan.

Moun k ap tradui yon chante sèvi ak yon metòd ki yon ti jan diferan ak metòd yo sèvi pou yo tradui lòt enfòmasyon, paske nonsèlman pawòl chante yo dwe gen sans, men tou yo dwe bèl e yo dwe fasil pou moun sonje.

Pawòl ki nan yon kantik louwanj dwe ase senp pou moun k ap chante a rive konprann sans chak fraz byen vit. Nan chak lang, pawòl yo ak mizik yo dwe byen mache ansanm e yo dwe koule natirèlman, kòmsi se moun k ap chante a ki te ekri yo.

Ki jan tradiktè yo rive fè sa? Ekip yo pa annik tradui pawòl ki nan liv Ann chante pou Jewova ann anglè a, yo te jwenn fòmasyon pou yo ekri pawòl ki bay menm ide ak menm santiman pawòl anglè a bay yo. Toutpandan yo fè anpil efò pou yo rete kole ak ide yo jwenn nan Bib la pou chak kantik, yo sèvi ak ekspresyon nan lang yo a ki fasil pou moun konprann e pou moun sonje.

Yon premye etap, se tradui kantik la mo pou mo. Apre sa, yon Temwen Jewova ki gen kapasite nan ekri pawòl pou mizik travay sou tèks yo tradui a pou fè l bèl, men pou l gen sans. Pou ekip tradiksyon an asire l pawòl nan kantik la toujou ann amoni ak Bib la, ni tradiktè yo ni moun k ap verifye tèks la egzamine travay moun ki te ekri pawòl yo.

Toupatou sou tè a, Temwen Jewova yo te kontan anpil lè yo te jwenn nouvo liv kantik la, e nou pa ka tann pou n wè l disponib nan plis lang toujou.